डेम्बेलेका लागि लिभरपुलको प्रस्ताव अस्विकार

एजेन्सी-स्पेनिस क्लब बार्सिलोनाले आफ्ना स्ट्राइकर ओसमाने डेम्बेलेका लागि इंग्लिस क्लब लिभरपुलले गरेको प्रस्तावलाई अस्विकार गरेको छ । लिभरपुलले डेम्बेलेका लागि गरेको ९४ मिलियन पाउण्डको प्रस्तावलाई बार्सिलोनाले अस्विकार गरेको हो । 

लिभरपुलले आफ्नो अट्रयाकिङ पोजिसनलाई बलियो बनाउन डेम्बेलेलाई अनुबन्ध गर्न चाहेको थियो । तर, बार्सिलोनाले उनलाई यती सस्तैमा बेच्न नमानेको रिपोर्टमा उल्लेख छ । डेम्बेलेलाई २०१७ मा बार्सिलोनाले १३५ मिलियन पाउण्डमा बोर्सिया डर्टमन्डबाट अनुबन्ध गरेको थियो । 

क्याम्प नाउमा आफुलाई उत्कृष्ट प्रमाणित गर्न संघर्षरत डेम्बेलेले यस सिजन बार्सिलोनाका लागि सबै खाले ४२ खेल खेलेका थिए । तर, क्लबले यतिबेला एन्टोनी ग्रिजमन र नेयमारलाई अनुबन्ध गर्न रुचि देखाएको छ । डेम्बेलेले सबै खाले ४२ खेलमा १४ गोल र ८ असिस्ट समेत गरेका थिए । 

उनी यस सिजन बिबादमा समेत आएका थिए। प्रशिक्षण सेसन गुमाउनुका साथै आफ्नो व्यवहार र अनुशासनका कारण डेम्बेले बिबादमा आउने गरेका थिए । उनी ग्रिजमन वा नेयमार मध्य एक अनुबन्ध भएपनि क्लबबाट बाहिरिन सक्ने रिपोर्टमा उल्लेख छ । 

तर, यसअघि अप्रिलमा क्लबका अध्यक्ष जोसेप मारियाले डेम्बेले नेयमार भन्दा उत्कृष्ट रहेको बताएका थिए । उनले नेयमार कुनै पनि हालतमा क्लबमा नफर्किने तथा डेम्बेले र फिलिप्पे काउटिन्होका लागि नयाँ योजना रहेको बताएका थिए । उनले काटिन्हो र डेम्बेलेसँग खुसी रहेको समेत बताएका थिए ।