काठमाडौं- नेपाली राष्ट्रिय टोलीका तिब्र गतिका बलर सोमपाल कामीले पहिलो पटक अन्तराष्ट्रय फ्रन्चाइज क्रिकेट लिग खेल्ने भएका छन् । बिहिबार भएको ड्राफ्ट अनुसार सोमपालले क्यानाडाको ग्लोबल टी-ट्वान्टी क्रिकेट लिग खेल्ने भएका हुन् ।
त्यस्तै राष्ट्रिय टोलीका अर्का महत्वपूर्ण सदस्य तथा लेग स्पिनर सन्दीप लामिछानेले उक्त लिग खेल्ने भएका छन् । ड्राफ्टबाट सन्दीपलाई टोरन्टो नेसनल्सले खरिद गरेको हो । यता सोमपालले विनिपेग हक्सबाट खेल्नेछन् ।
सन्दीपले टोरन्टो नेसनल्सबाट खेलेबापत ६० हजार अमेरिकी डलर पाउने छन् भने सोमपालाई हक्सले ३ हजार अमेरिकी डलरमा अनुबन्ध गरेको हो । सन्दीपले लगातार दोस्रो सिजन क्यानाडाको ग्लोबल टी-ट्वान्टी क्रिकेट लिग खेल्ने भएका छन् । गत सिजन उनले मोन्ट्रेल टाइगर्सबाट खेलेका थिए ।
सन्दीपको टिमको मार्की प्लेयर भारतीय स्टार युवराज सिंह रहेका छन् । पहिलो पटक ग्लोबल टी-ट्वान्टी लिग खेल्न लागेका सोमपाल विदेशी फ्रेन्चाईज लिग खेल्ने दोस्रो नेपाली क्रिकेटर बनेका छन् । यस सिजनको लिग आगामी जुलाई २५ देखि १५ सम्म क्यानाडामा आयोजना हुँदैछ।
प्रकाशित: Dec 31, 2017| 18:23 आइतबार, पुस १६, २०७४