वार्नरको शतकमा बंगलादेशलाई विशाल लक्ष्य

एजेन्सी- ओपरन ब्याट्सम्यानल डेभिड वार्नरको उत्कृष्ट शतकको मद्दतले अष्ट्रेलियाले बंगलादेशलाई ३ सय ८२ रनको विशाल लक्ष्य सुम्पेको छ । टस जितेर पहिले ब्याटिङ गर्ने निर्णय गरेको अष्ट्रेलियाका लागि वार्नरले १६६ रनको उत्कृष्ट शतकीय पारी खेलेका हुन् । 

उनले १४७ बलको सामना गर्दै १४ चौका र ५ छक्काको मद्दतमा १६६ रन जोडेका हुन् । जारी विश्वकपमा वार्नरको यो दोस्रो शतक हो । उनी जारी विश्वकपको एकै खेलमा सर्वाधिक रन जोड्ने खेलाडीको पहिलो स्थानमा छन् । उनको १६६ रन नै जारी विश्वकपको एक पारीको सर्वाधिक स्कोर हो । 

त्यस्तै निर्धारित ५० ओभरमा ५ विकेट गुमाएर ३ सय ८१ रन जोडेको अष्ट्रेलियका लागि आरोन फिन्च र उसमान ख्वाजाले खर्धशतकीय पारी खेले । ख्वाजाले ७२ बलमा १० चौका प्रहार गर्दै ८९ रनको उत्कृष्ट अर्धशतकीय पारी खेलेका हुन् । 

त्यस्तै कप्तान फिन्चले ५१ बलमा ५ चौका र २ छक्क सहित ५३ रनको योगदान दिए । ग्लेन म्याक्सवेलले ३२ रन जोड्दा, मार्कुस स्टोयनिस १५ र एलेक्स क्यारी ११ रनमा अविजित रहे । बंगलादेशका लागि सौम्य सरकारले सर्वाधिक तीन विकेट लिए ।