पल्सर स्पोर्ट्स अवार्डलाई सगरमाथा सिमेन्ट र टर्किस एयरलाईन्सको सह-प्रायोजन

काठमाडौं - एनएसजेएफ पल्सर स्पोर्ट्स अवार्डलाई सगरमाथा सिमेन्ट र टर्किस एयरलाईन्सले सह-प्रायोजन गरेका छन्। असार १७ गते प्रज्ञा भवन कमलादीमा हुने कार्यक्रमलाई  सगरमाथा सिमेन्ट र टर्किस एयरलाईन्सले सह-प्रायोजन गर्नेबारे बिहिबार एक वर्षे सम्झौता गरेका हुन्।

 तेस्रो साता आयोजना हुने अवार्डका लागि घोराही सिमेन्ट प्रालीको उत्पादन सगरमाथा सिमेन्ट र टर्किस एयरलाईन्स सह-प्रायोजकको रुपमा जोडिएका हुन् । 

नेपाल खेलकुद पत्रकार मञ्च (एनएसजेएफ) का तर्फबाट दुर्गानाथ सुवेदीले घोराही सिमेन्टका निर्देशक आदित्य संघाई र टर्किसका नेपाल जनरल म्यानेजर अब्दुल्लाहसंग छुट्टाछुट्टै सम्झौता पत्रमा हस्ताक्षर गरे।

सम्झौताअनुसार सगरमाथा सिमेन्टले अवार्डलाई ५ लाख रुपैयाँ उपलब्ध गराउनेछ भने टर्किस एयरलाईन्सले वर्षको उत्कृष्ट पुरुष र महिला विधाका विजेता खेलाडीलाई टर्किस एयरलाईन्सको सेवा भएको कुनैपनि गन्तब्यका लागि ५ लाख रुपैयाँ बराबरको दुईतर्फी टिकट उपलब्ध गराउनेछ। यस्तै एयरलाईन्सले मञ्चका सदस्य र मञ्चको सिफारिसमा राष्ट्रिय खेलाडीलाई समेत हवाई टिकटमा १० प्रतिशत छुटको व्यवस्था गर्नेछ।