बिहारमा गर्मीको आतंक : १९४ जनाको मृत्यु

काठमाडौं- भारतको बिहारमा अत्यधिक गर्मी र लुका कारणका १३८ जनाको मृत्यु भएको छ। पछिल्लो तीन दिनमा यति ठूलो संख्यामा मानिसहरुको मृत्यु भएको हो । 

भारतीय सञ्चारमाध्यमका अनुसार सोमवार मात्रै अत्याधिक गर्मीका कारण बिहारमा १९ जनाको मृत्यु भएको छ । आइतवार मात्रै विहारमा ११४ जनाको ज्यान गएको थियो भने शनिवार ६१ के मृत्यु भएको थियो। 

सबैभन्दा बढी मृत्यु हुनेमा औरंगाबाद, नवादा, पटना, पूर्वी बिहार, रोहतास, जहानाबाद र भोजपुर जिल्लाका बासिन्दा छन्। 

बिहारको राजधानी पटनासहित प्रमुख सहरहरुको तापक्रम ४५ डिग्री सेल्सियस पुगेको छ। तापक्रम बढेसँगै लु चल्न थालेपछि धमाधम मानिसहरुका मृत्यु भएको भारतीय सञ्चारमाध्यमहरुले जनाएका छन् ।  

गर्मी अत्याधिक बढेपछि बिहारका सबै विद्यालय बन्द गरिएको छ। राज्यमा देखिएको अत्यधिक गर्मीका कारण सबै विद्यालय जुन २२ सम्म बिदा दिइएको त्यहाको शिक्षा मन्त्रालयले जनाएको छ । त्यसपछि आवश्यकताअनुसार बिहान स्कुल चलाउने समेत जनाइएको छ । 

यस्तै गर्मी बढेपछि बिहारमा एकै ठाउँमा ४ जनाभन्दा बढी व्यक्ति जम्मा हुन प्रतिबन्ध लगाइएको छ।

बिहान ११ बजेदेखि अपराह्न ४ बजेसम्म सरकारी, गैरसरकारी निर्माण कार्य लगायतका काम गर्न नपाइने भएको छ। खुला ठाउँमा कुनै किसिमका सांस्कृतिक कार्यक्रम गर्न वा एकत्रित हुन प्रतिबन्ध लगाइएको छ।