पाकिस्तानविरुद्ध रोहित र राहुलको नयाँ रेकर्ड

एजेन्सी- रोहित शर्मा र केएल राहुलले आइसिसी एकदिवसीय विश्वकप क्रिकेट अन्तरगत आइतबार पाकिस्तानविरुद्ध भएको खेलमा नयाँ रेकर्ड बनाएका छन् । ओपनरद्वयले पाकिस्तानविरुद्धको २३ वर्ष पुरानो रेकर्डलाई आफ्नो नाममा गरेका छन् । 

शर्मा र राहुलले ओपनिङ ब्याटिङ गर्दै पहिलो विकेटका लागि विश्वकपमा पाकिस्तानविरुद्ध हाल सम्मकै ठुलो साझेदारी गरेका छन् । यसअघि सन् १९९६ को विश्वकमा सचिन तेन्दुलकर र नभजोत सिंह सिद्धुले बनाएका थिए । 

सचिन र सिद्धुले पहिलो विकेटका लागि ९० रनको साझेदारी गरेका थिए । उक्त खेल बेंगलोरमा भएको थियो । उक्त खेल भारतले ३७ रनले जितेको थियो । रोहित र राहुले सचिन र सिद्धुको पाकिस्तानविरुद्धको रेकर्ड १६ औं ओभरमा तोडेका थिए । 

दुबै खेलाडीले २४ औं ओभरसम्म खेल्दै १३६ रनको साझेदारी गरे । यससँगै राहुल र रोहितको ओपनिङ जोडी पाकिस्ताविरुद्ध विश्वकपमा १०० रन पुरा गर्ने पहिलो जोडी बनेको छ । भारतका अन्य मध्यक्रमका ब्याटसम्यानले पाकिस्तानविरुद्ध विश्वकपमा मात्र ३ पटक १०० रनको साझेदारी गरेका छन् । 

यसअघि २००३ को विश्वकपमा पहिलो पटक सचिन र मोहम्मद कैफको जोडीले १०० रनको साझेदारी गरेको थियो । त्यस्तै २०१५ मा शिखर धवन र विराट कोहली तथा विराट कोहली र सुरेश रैनाले एक सय रनको साझेदारी गरेका थिए ।