रोमाञ्चक खेल : वार्नरको शतक, आमिरले लिए पाँच विकेट

एजेन्सी- ओपनर ब्याट्सम्यान डेभिड वार्नरको शतकको मद्दतले अष्ट्रेलियाले पाकिस्तानलाई जितका लागि ३ सय ८ रनको विशाल लक्ष्य सुम्पेको छ । टस हारेर पहिले ब्याटिङको निम्तो पाएको अष्ट्रेलियाले ४९ ओभरमा सबै विकेट गुमाउँदै ३ सय ७ रन जोडेको हो । 

अष्ट्रेलियाका लागि वार्ननरले १०७ रनको शतकीय पारी खेले । उनले १११ बलको सामना गर्दै ११ चौका र १ छक्को मद्दतमा १०७ रनको शतकीय पारी खेलेका हुन् । त्यस्तै कप्तान आरोन फिन्चले उत्कृष्ट अर्धशतकीय पारी खेले । 

उनले ८४ बलमा ६ चौका र ४ छक्का प्रहारु गर्दै ८२ रनको उत्कृष्ट अर्धशतकीय पारी खेलेका हुन् । फिन्च र वार्नरले पहिलो विकेटका लागि १४६ रनको साझेदारी गरेका थिए । फिन्च २३ औं ओभरको पहिलो बलमा क्याच आउट भएका हुन् । 

उनी मोहम्मद आमिरको बलमा मोहम्मद आफीजले क्याच गर्दै पेभिलियन फर्काएका थिए । त्यस्तै शाउन मार्शले २३, ग्लेन म्याक्सवेलले २०, एलेक्स केरीले २०, उस्मान खवाजाले १८ र स्टिभन स्मिथले १० रन जोडे । 

पाकिस्तानका लागि मोहम्मद आमिरले सर्वाधिक पाँच विकेट लिए । उनले १० ओभर बलिङ गर्दै मात्र ३० रन खर्चेर पाँच विकेट लिएका हुन् । त्यस्तै शाहीन शाह अफ्रीदीले दुई तथा मोहम्मद हाफिज, हसन खली र वहाब रियजले एक विकेट लिए ।