रोहितको शतकमा भारतको विजयी सुरुवात

एजेन्सी - रोहित शर्माको शतकीय पारीको मद्दतले आईसीसी एकदिवसीय विश्वकपमा क्रिकेटमा भारतले दक्षिण अफ्रीकालाई पराजित गर्दै विजयी सुरुवात गरेको छ  । बुधबार भएको खेलमा भारतले दक्षिण अफ्रीकालाई ६ विकेटले पराजित गर्दै भारतले सुखद सुरुवात गरेको हो ।

दक्षिण अफ्रीकाले दिएको २२८ रनको मध्यम लक्ष्य पछ्याएको भारतले ४७.३ ओभरमा मात्र ४ विकेट गुमाएर पुरा गर्यो । भारतका लागि रोहित शर्माले अविजित १२२ रनको शतकीय पारी खेले । उनले १४४ बलमा १३ चौका र २ छक्कासहित १२२ रनको योगदान दिएका हुन् । 

त्यस्तै महेन्द्र सिंह धोनीले ३४ रन जोड्दा लोकेश राहुलले २६ रन बनाए । कप्तान विराट कोहली १८ रनमा आउट हुँदा शिखर धवन ८ रनमा पेभेलियन फर्किए । हार्दिक पाण्डयले अविजित १५ रन बनाए । दक्षिण अफ्रीकाका कागीसो राबडाले २ विकेट लिए ।

यसअघि टस जितेर पहिले ब्याटिङ गरेको दक्षिण अफ्रीकाले ५० ओभरमा ९ विकेट गुमाउँदै २२७ रन जोडेको थियो । दक्षिण अफ्रीकाका लागि क्रिस मोरिसले ४२ रन जोडे । उनले ३४ बलमा १ चौका र २ छक्का प्रहार गर्दै ४२ रन जोडेका हुन् । फाप डुप्लेसीले ३८ रन जोडे । उनले ५४ बल खेल्दै ४ चौकाको मद्दतमा ३८ रन जोडेका हुन् । 

त्यस्तै एन्डिले फेलुक्वायोले ६१ बलमा २ चौका र १ छक्का सहित ३४ रन जोडे । डेभिड मिलरले ४० बलमा १ चौका सहित ३१ रन जोडे । कागिसो राबाडाले ३५ बलमा २ चौका प्रहार गर्दै खविजित ३१ रन जोडे । रासीइ भान डेर डुसेनले २२, क्विन्टन डिकँकले १० रन जोडे । 

भारतका लागि युजेन्द्र चाहलले ४ विकेट लिए । त्यस्तै जस्प्रित बुम्राहले र भुवनेश्वर कुमारले दुई दुई तथा कुलदिप यादवले एक विकेट लिए ।