प्रदेश ३ लाई पराजित गर्दै आर्मी फाइनलमा

काठमाडौं- विभागीय टोली त्रिभुवन आर्मी प्रधानमन्त्रि कप एकदिवसीय क्रिकेटको फाइनल प्रवेश गरेको छ । कीर्तिपुरस्थित टियु मैदानमा बुधबार भएको सेमिफाइनल खेलमा प्रदेश ३ लाई ११७ रनले पराजित गर्दै आर्मी फाइनल प्रवेश गरेका हो । 

आर्मीले दिएको ३१० रनको लक्ष्य पछ्याएको प्रदेश ३ ले ५० ओभरमा ९ विकेट गुमाउँदै मात्र १९२ रन बनाउन सक्यो । प्रदेश ३ का लागि इसान पाण्डेले ७९ रनको अर्धशतकीय पारी खेले पनि टोलीको जितका लागि प्रयाप्त भएन् । उनले ११७ बलमा ३ चौका र ४ छक्का प्रहार गर्दै ७९ रनको अर्धशतकीय पारी खेलेका हुन् । 

ज्ञानेन्द्र मल्लले २६, कप्तान पारस खड्काले १९, नन्दन यादवले १८  र आदिल खानले १५ रन जोड्न बाहक अन्य ब्याट्सम्यानले दोहोरो अंकमा रन छुन सकेनन् । आर्मीका लागि शाहब आलमले तीन र करन केसीले दुई विकेट लिए । त्यस्तै सुसन भारी, रोहित पौडेल र कुसल मल्लले एक एक विकेट लिए । 

यसअघि टस हारेर पहिले ब्याटिङको निम्तो पाएको आर्मीले ५० ओभरमा ६ विकेट गुमाउँदै ३०९ रन बनाएको थियो । आर्मीका लागि कप्तान विनोद भण्डारी र राजु रिजालले अर्धशतकीय पारी खेले । भण्डारीले आक्रमक ब्याटिङ गर्दै मात्र ४२ बलमा ५ चौका र ५ छक्का प्रहार गर्दै ७५ रनको अविजित योगदान दिए । 

त्यस्तै राजुले ८६ बलमा ४ चौका र २ छक्काको मद्दतमा ५१ रन जोडे । रोहित कुमार पौडेलले ३५ बलमा ४ चौका र १ छक्का सहित ४३ रनको योगदान दिए । हरि चौकाहानले ३७ बलमा ४ चौका र १ छक्का सहित ३८, राजेश पुलामी मगरले ३९ बलमा २ चौका सहित २९, करन केसीले २१, हरिशंकर झाले १२ रन जोड्दा कुसल मल्लले अविजित २६ रन जोडे ।  

प्रदेश ३ का लागि जितेन्द्र ठकुरी र नन्दन यादवले समान दुइ दुई विकेट लिए । त्यस्तै कप्तान पारस खड्का र सोनु देबकोटाले एक एक विकेट लिए ।