पल्सर स्पोर्टस् अवार्ड असार १७ गते

काठमाडौं- नेपाल खेलकुद पत्रकार मञ्च (एनएसजेएफ)ले हरेक वर्ष आयोजना गर्दै आएको बजाज पल्सर स्पोर्टस् अवार्ड २०७५ आगामी असार १७ गते हुने भएको छ । १६ औं संस्करणको स्पोर्टस् अवार्ड असार १७ गते प्रदान गरीने आयोजक मञ्चले आइतबार पत्रकार सम्मेलन गर्दै जानकारी दिएको हो । 

काठमाडौंको कमलादीस्थित प्रज्ञा भवनमा भव्य कार्यक्रकासाथ विभिन्न १० विधामा अवार्ड प्रदान गरिने छन् । अवार्ड वर्ष उत्कृष्ट खेलाडी पुरुष, वर्ष उत्कृष्ट खेलाडी महिला, युवा वर्ष खेलाडी, वर्ष प्रशिक्षक, पिपल्स च्वाइस अवार्ड, पारा एथलिट, स्पेसल अवार्ड, लाइफटाइम एचिभमेन्ट अवार्ड र टिम अफ द इयर गरी ९ विधामा अवार्ड प्रदान गरिने मञ्चले जनाएको छ । 

त्यस्तै यस वर्ष एक नयाँ विधा थप गरिएको छ । यस वर्ष मञ्चले इन्टरनेशनल एसियन स्पोर्ट्स जर्नालिस्ट अवार्ड थप गरेको मञ्चमा अध्यक्ष दुर्गानाथ सुवेदीले जानकारी दिए । 

अवार्डमा वर्ष खेलाडी पुरुष र महिला, पिपल्स च्वाइस र प्रशिक्षक गरी चार विधाका विजेताले बजाज पल्सर मोटरसाइकल प्राप्त गर्नेछन् । अन्य विधाका विजेताले जनही ५० हजार नगदन तथा गिफ्ट ह्याम्पर प्राप्त गर्ने छन् । 

अवार्ड कार्यक्रमको मुख्य प्रायोजनमा हंशराज हुलासचन्द एण्ड कम्पनी प्रालि रहेको छ । प्रायोजनाका लागि मञ्चका अध्यक्ष सुवेदी र हंशराजतर्फबाट अभिमन्यु गोल्छाले आइतबार एक कार्यक्रमकाबीच सम्झौता पत्रमा हस्ताक्षर गरे । 

सम्झौतासँगै हंशराज हुलासचन्दले मञ्चलाई यस वर्ष साढे २८ लाख रुपैयाँ बराबरको नगद र जिन्सी सामान उपलब्ध गराउने छ । जसमा ४ विधाका खेलाडीले पाउने पल्सर बाइक पनि रहने छ ।