अछाममा भिषण आगलागी, सात घर जलेर नष्ट

धनगढी- अछामको ढकारी गाउँपालिका–४ बलातामा भिषण आगलागी भएको छ । 

आगलागीबाट सात वटा घर जलेर नष्ट भएका छन् भने सयौ पशु चौपाया जलेका छन् । बलाताको बुढाबाडा टोलमा बेलुकी करिव सात बजेतिर लागेको आगोबाट सात घर र घरको गोठमा रहेका सयौ पशु चौपाया जलेको स्थानीयले जनाएका छन् । 

स्थानीय प्रेम बुढाले दिएको जानकारी अनुसार मीन बुढाको घरबाट सुरु भएको आगोले सात घर पुर्ण रुपमा जलेका छन् भने घरको गोठमा रहेका सबै पशु चौपाया जलेका छन् । घरमा रहेका अन्नपात लुगाकपडा सबै जलेका छन् । प्रत्येकको गोठमा कम्तिमा पनि २०–२५ बाख्रा र गाई गोरु रहेकाले जलेका पशु चौपायाको संख्या सय बढी हुन सक्ने बुढाले बताए । 

मीनको घर नजिक बारीमा झारपात जलाउन बालेको आगो घरमा सल्किएको अनुमान स्थानीयले गरेका छन् । मीन बुढाको घरबाट नजिकै रहेको वडा अध्यक्ष भक्त बुढाको घर हुँदै रुदा बुढा, जोगी बुढा, इन्द्र बुढालगायतको घरमा सल्किएको उनले जानकारी दिए । 

आगलागी शनिबार बिहान मात्र नियन्त्रणमा आएको छ । रातभर स्थानीय र प्रहरी आगो नियन्त्रणमा जुटेका थिए । मीन बहादुर बुढाका ५० बढी पशु चौपाया जलेका छन् । गाउँ नजिकै रहेको भडार (कुल देउताको पुजा गर्ने ठाउ) पनि जलेको छ । जसमा रहेका सुन चादी सबै जलेका छन् । अछामको दक्षिण भुभागमा पर्ने बलाता भौगोलीक रुपमा निकै बिकट मानिन्छ ।