पहिरोले पासाङल्हामु राजमार्ग अवरुद्ध

रसुवा– भारी वर्षासँगै आएको पहिराका कारण धुन्चे–ठूलोभार्खुबीचको पासाङल्हामु राजमार्ग अवरुद्व भएको छ। प्रमुख जिल्ला अधिकारी ईश्वरीप्रसाद ढकालका अनुसार धुन्चेभन्दा पारि खोपाङ पाखाको राजमार्गमा पहिरो जाँदा सवारी आवागमन बन्द भएको हो। नेपाल–चीनबीचको व्यापार व्यवसाय गर्ने एकमात्र अन्तर्राष्ट्रिय राजमार्ग भएका कारण छिटोभन्दा छिटो खुलाउन पहल कदमी सुरु भइरहेको बताइएको छ।

राजमार्ग अवरूद्ध हुँदा सवारीसाधन बीचबाटामै अलपत्र परेका छन्। उत्तरी रसुवामा आकस्मिक रूपमा पर्ने बिरामीसमेत जिल्ला अस्पताल धुन्चे ल्याउन समस्या भएको छ। आकस्मिक पहिरो पन्छाउने प्रयोजनका लागि सडक विभागले धुन्चेमा राखिएको लोडर सञ्चालन गर्न अपरेटर नहुँदा पहिरो पन्छाउन समस्या उत्पन्न भएको ट्राफिक प्रहरीले जनाएको छ। धुन्चेमा उपकरण भएको र चालक भने काठमाडौ्रतर्फ गएको ट्राफिक प्रहरीको भनाइ छ।

पछिल्लो जानकारीअनुसार स्याफ्रुबेंसीमा रहेका एक सडक प्राविधिकले स्थलगत निरीक्षण गरी मंगलबारसम्म राजमार्ग सञ्चालन गराउने प्रतिबद्वता गरेको प्रमुख जिल्ला अधिकारी ढकालले जानकारी दिए।रासस