जीप दुर्घटनामा तीनको ज्यान गयो

धनगढी – बैतडीमा जीप दुर्घटना हुँदा तीन जनाको मृत्यु भएको छ। सोही दुर्घटनामा परी तीन यात्रु घाइते भएका छन्। देहीमाण्डौंबाट नागार्जुन जाँदै गरेको ग १ ज ४९२१ नम्बरको जीप दशरथचन्द नगरपालिका–११ नानीगाड भन्ने स्थानमा दुर्घटनामा परेको हो। 

दुर्घटनामा परी बैतडीको दशरथचन्द नगरपालिका– १० बाराकोटका अन्दाजी ४०/४५ वर्षका हिराबल्लभ भट्ट, सोही ठाउँका अन्दाजी ६५ वर्षीय नरुली भट्टको घटनास्थलमै ज्यान गएको छ। मृत्यु हुने मध्ये एकजनाको भने सनाखत हुन नसकेको प्रहरीले जनाएको छ।

दुर्घटनामा परी दशरथचन्द नगरपालिका–१० का अन्दाजी ४०/४५ वर्षका प्रकाश भट्ट, कञ्चनपुरको महेन्द्रनगर बस्ने अन्दाजी २६ वर्षीय राहुल भट्ट र जीपचालक दशरथचन्द नगरपालिका १० का नवीन भट्ट घाइते भएका छन्। जीप दुर्घटनाको कारण खुलेको छैन्। 

जीप सडकबाट डेढसय मिटर तल खसेको प्रहरीले जनाएको छ। घटनास्थलतर्फ प्रहरी नायव उपरीक्षक नेत्रमणी गिरी नेतृत्वको टोली गएको छ भने घाइतेहरुलाई अस्पताल ल्याउने काम भइरहेको प्रहरीले जनाएको छ।