आजका अखबार : बजेटअघि नै आकासियो महँगी 

काठमाडौं- राजधानीबाट प्रकाशित आइतबारका राष्ट्रिय दैनिक अखबारहरुले विविध विषयका खबरलाई प्राथमिकतामा पारेका छन् । 

कांग्रेसमा सभापति शेरबहादुर देउवालाई कारबाहीको मागसहित १२ सय उजुरी परेको विषयलाई मुख्य समाचार बनाएको आजको नयाँ पत्रिकाले बजेट अघि नै महँगीले आकास छोएको विषयलाई प्राथमिकताका साथ छापेको छ । 

सामान्यतया बजेट भाषणपछि महँगी बढ्ने गर्थ्याे । तर, यसपटक बजेटअघि नै बजार भाउ अकासिन थालेको समचारमा उल्लेख छ । आगामी आर्थिक वर्ष ०७६/७७ बाट कर्मचारीको तलब र वृद्धभत्ता बढ्ने घोषणा सरकारले गरिसकेको छ । यसकारण बजेटपछि मूल्यवृद्धि हुने निश्चित छ । तर, त्यसअघि नै महँगी बढ्दा उपभोक्ता आक्रान्त बनेका छन् ।

महँगीको सबैभन्दा धेरै असर हरियो तरकारीमा परेको छ । महिनादिनअघि ५५ रुपैयाँ प्रतिकिलोमा बिक्री भएको गोलभेडा कालिमाटी बजारमा शनिबार एक सय १० रुपैयाँ प्रतिकिलोमा बिक्री भएको छ । त्यही गोलभेडाको दाम काठमाडौंका साना बजार र किराना पसलमा एक सय २० रुपैयाँ प्रतिकिलोसम्म पर्छ ।

खसीको मासुको भाउ प्रतिकिलो दुई सय रुपैयाँ बढेको छ । जिउँदो खसीको भाउ प्रतिकिलो छ सयबाट बढेर छ सय ५० रुपैयाँसम्म पुगेको छ । एक महिनाअघि एक हजार ५० रुपैयाँ प्रतिकिलोसम्म रहेको खसीको मासुको भाउ अहिले एक हजार दुई सय ५० पुगिसकेको छ ।

चामल, दाल, तेललगायत खाद्यपदार्थको मूल्य पनि बढेको छ । खुद्रा व्यापार संघका अध्यक्ष राजकुमार श्रेष्ठका अनुसार ९० रुपैयाँ प्रतिकिलो रहेको मुसुरो दाल एक सय पुगेको छ । मासको दाल एक सय १० बाट एक सय २० र ठूलो खालको मासको दाल र रहर दाल एक सय ३० बाट १४० रुपैयाँ प्रतिकिलो पुगेको छ ।
 
खुद्रा व्यापार संघका अनुसार जिरा मसिनो (लोकल) चामल ३३ सय प्रतिबोराबाट बढेर ३३ सय ५० पुगेको छ । सोना मन्सुली (सामान्य) १४ सय प्रतिबोराबाट बढेर १४ सय ५० पुगेको छ । खानेतेल प्रतिलिटर १० रुपैयाँ बढेको छ । सूर्यमुखी तेल एक सय ४० बाट एक सय ५० रुपैयाँ पुगेको श्रेष्ठले बताए । ७५ रुपैयाँ प्रतिकिलोमा पाइरहेको चिनी ८० पुगिसकेको नयाँ पत्रिकाले लेखेको छ । 

आजको कान्तिपुरले भने पशुपति क्षेत्रस्थित संस्कृत माध्यमिक विद्यालयको जग्गामा डोजर लगाएर वडा कार्यालय बनाउन भवन शिलन्यास गरिएको विषयलाई मुख्य समाचार बनाएको छ। विद्यालयको अनुमति विनै विद्यार्थी र शिक्षकहरु पन्छाएर वडा नम्बर ८ को कार्यालय भवन मेयर विद्यासुन्दर शाक्यले शिलन्यास गरेका हुन् । 

जग्गा कब्जामा परेपछि विद्यालयले शिक्षा मन्त्रालय, जिल्ला प्रशासन कार्यालय र गुठी संस्थानमा उजुरी दिएका छन् । शैक्षिक संस्थाको जग्गामा नगरपालिकाको भवन बनाउनु न्यायसंगत नहुने भन्दै विद्यालयले उजुरी दिएको समाचारमा उल्लेख  छ। 

यस्तै कान्तिपुरले पशुपतिको जग्गा अहिले पनि माना चामलका हिसावले भाडा लगाइएको पनि खुलासा गरेको  छ । यसरी जग्गा लिनेमा तारागाउँ रिजेन्सी (होटल हायात), गौशालाको द्वारिकाज होटल, तिलगंगा आँखा अस्पताल, त्रिभुवन विमानस्थल, सूचना विभाग, पत्रकार महासंघ र प्रेस काउन्सिल भएको सञ्चारग्राम पनि रहेको छ ।
 
आजको अन्नपूर्ण पोस्ट्ले भने प्रदुषण विकराल बन्दै गएको विषयलाई मुख्य समाचार बनाएको छ ।
 
नागरिक दैनिकले भारतले पेलेर सडक बनाउँदा दार्चुलको सिमा क्षेत्रमा क्षती पुगेको विषयलाई मुख्य समाचार बनाएको छ । भारतीय पक्षले जथभावि रुपमा विस्फोट गराउने र अनेक निर्माण समाग्री प्रयोग गर्दा यो स्थिती देखा परेको हो ।