अखबार : १३ खर्बको बजेटमा विकास खर्च १ खर्बमात्रै

काठमाडौं- राजधानीबाट प्रकाशित बिहीबारका राष्ट्रिय दैनिक अखबारहरुले विविध विषयका खबरलाई पहिलो प्राथमिकतामा पारेका छन् । 

आजको नयाँ पत्रिकाले समृद्धिको नारा घन्काइराखेको सरकारले बजेटसमेत खर्च गर्न नसकेको विषयलाई मुख्य समाचार बनाएको छ । अझै विकास तर्फ सरकारले गरेको खर्चको स्थिती अत्यन्त दयनीय रहेको समाचारमा उल्लेख छ । अघिल्लो वर्षजति पनि खर्च नसकेको सरकारले १३ खर्बको बजेटमा विकास तर्फ जम्मा १ खर्ब रुपैयाँ मात्रै खर्च भएको छ ।
 
आर्थिक वर्षको १० महिनामा सरकारले बजेटको आधा रकम अर्थात ५० प्रतिशत मात्रै खर्च गरेको छ । १३ खर्ब १५ अर्ब १६ करोडको बजेटमध्ये  वैशाख मसान्तसम्म जम्मा ६ खर्ब ६१ अर्ब ९७ करोड खर्च भएको छ । बजेट अनुसार काम गर्न अब बाँकी ६३ दिनमा दैनिक करिब साढे पाँच खर्ब रुपैयाँ खर्च गर्नु पर्ने देखिएको समाचारमा जनाइएको छ ।
 
यस्तै नयाँ पत्रिकाले प्रधानमन्त्री केपीशर्मा ओली कम्बोडियाबाट स्वदेश फर्किदा पनि आकाश ठप्प बनाइएको विषयलाई प्राथमिकताका साथ छापेको छ । प्रधानमन्त्री चढेको जहाजका लागि आकाश ठप्प पारिँदा बुधबार साँझ एयर अरेबिया, फ्लाई दुबई, क्याथे ड्रागन, इत्तिहाद र कतार एयरवेजका यात्रुले आकाशमा फन्को लगाइरहनुपरेको समाचारमा उल्लेख छ ।
 
आजको अन्नपूर्ण पोस्ट्ले भने सहकारीहरुको ठगी धन्दालाई मुख्य समाचार बनाएको छ । 'स्वाहाकारी !' शीर्षकमा खबर लेखेको उसले विभिन्न समयमा विभिन्न सहकारीले गरेको ठगीको उदाहरण दिदै बचतकर्ताहरुको विल्लिबाठ भएको विषय उठान गरेको छ ।
 
सहकारीहरुविरुद्ध अहिलेसम्म १२ हजार ९ सय ६२ वटा उजुरी परेका छन् भने १५५ वटालाई समस्याग्रस्त घोषणा गरिएको छ । अहिलेसम्मा सहकारी ठगी गरेको रकम भने १२ अर्ब रहेको छ । सरकारले सहकारीलाई बेलगाम छाडी दिएकै कारण सहकारीमा समस्या बढ्दै गएको समाचारमा जनाइएको छ ।
 
अन्नपूर्णले युवासंघको स्थापना दिवसमा भएको कार्यक्रममा नेकपाका अध्यक्ष पुष्पकमल दाहाल प्रचण्ड र नेता इश्वर पोखरेलबीच भएको घोचपेचलाई पनि पहिलो पृष्ठमा छापेको छ । दुई नेताबीच वैचारिक कार्यदिशमा जुहारी चलेको हो ।
 
यसै विषयलाई आजको कान्तिपुर दैनिकले घोचपेचमै उत्रिए दाहाल र पोखरेल शीर्षकमा मुख्य समाचार छापेको छ । उसले नेकपाभित्रको विवाद बुधबार सार्वजनिक मञ्चबाटै छताछुल्ल भएको उल्लेख गर्दै नेकपा भित्र विवाद बढ्दै गएको जनाएको छ ।
 
बुधबार भएको युवासंघको कार्यक्रममा उपप्रधानमन्त्री समेत रहेका नेता पोखरेलले वैचारिक रुपमा स्पष्ट भइएन भने न हाँस न कुखुराको चाल हुन्छ भन्दै चेतावनी दिएका थिए । प्रचण्डले त्यसको जवाफमा विचार भनेर धेरै माथापच्ची गरेको भए पार्टी एकतै नहुने बताएका थिए ।
 
यस्तै कान्तिपुरले त्रिवि सेवा आयोगले सञ्चालन गरेको खुला परिक्षामा अनियमितता भएको निष्कर्ष अख्तियारले निकालेको विषयलाई पनि प्राथमिकताका साथ छापेको छ । भेटिएका केहि तथ्यांकले गम्भीर अनियमितताको संकेत गर्ने अख्तियार स्रोतको दाबी छ ।
 
आजको नागरिक दैनिकले भने त्रिभुवन विश्वविद्यालयअन्तर्गतको मानवशास्त्र केन्द्रीय विभागका अधिकारीहरुले युएसएआइडीबाट प्राप्त रकम दुरुपयोग गरेको खुलासा गरेको छ । विभागका नाममा आएको १४ करोड रुपैयाँका दुई फरक फरक परियोजनाको रकम दुरुपयोग भएको समाचारमा उल्लेख छ।