पर्यटन प्रवर्द्धन गर्न कान्छुसँग सम्झौता

भैरहवा – मित्रराष्ट्र जनवादी गणतन्त्र चीनको कान्छु प्रदेशसँग प्रदेश नं ५ को सरकारले पर्यटन प्रवर्द्धन र पूर्वाधार निर्माणका लागि आवश्यक सम्झौता गरेको छ। दुवै देशका प्रान्तीय प्रमुखको उपस्थितिमा बुधबार बुटवलमा उक्त सम्झौतापत्रमा हस्ताक्षर भएको प्रदेश नं ५ का मुख्यमन्त्री कार्यालयका प्रेस सल्लाहकार शेरबहादुर केसीले बताए।

द्विपक्षीय सहयोग र साझेदारीका लागि भएको समझदारीपत्रमा उद्योग, पर्यटन, वन तथा वातावरण मन्त्रालयका सचिव धनञ्जय पौडेल र कान्छु प्रदेशका सांस्कृतिक तथा पर्यटन निर्देशक थन वइतोङले हस्ताक्षर गरेका छन्। मुख्यमन्त्री शंकर पोखरेल र गभर्नर थाङ रनच्यानको उपस्थितिमा भएको उक्त समझदारीपत्रमा सांस्कृतिक आदानप्रदान र पर्यटन प्रवर्द्धनका लागि दुई देशका विज्ञ, उद्यमी र सरकारी अधिकारीको भ्रमण आदानप्रदान बढाउने, नेपालको पर्यटन विकासका लागि चिनियाँ लगानी बढाउने समेत उल्लेख छ।

त्यसैगरी, रुपन्देहीको सैनामैना नगरपालिका र चीनको गाननान स्वायत्त प्रिफेक्चरबीच भगिनी सम्बन्ध कायम गर्ने प्रारम्भिक सहमति भएको छ। सहमतिपत्रमा सैनामैना नगरपालिकाका मेयर चित्रबहादुर कार्की र गाननान स्वायत्त प्रिफेक्चरका डेपुटी गर्भनर सी चानयानले हस्ताक्षर गरी सहमतिपत्र आदानप्रदान गरेका छन्।

मुख्यमन्त्री तथा मन्त्रिपरिषद् कार्यालयमा भएको भेटवार्तामा मुख्यमन्त्री पोखरेलले प्रदेश ५ को विशेषता र सम्भावनाबारे जानकारी गराउँदै संघीयता कार्यान्वयनको एक वर्षमा आवधिक योजना र कानुन निर्माणलाई प्राथमिकता दिएको र योजनाबद्ध विकासको बाटो तय गरेको बताएका छन्।

सो अवसरमा गभर्नर रनच्यानले प्रदेश ५ र बुद्ध जन्मस्थल लुम्बिनी भ्रमण गर्न पाउँदा खुसी लागेको बताउँदै द्विपक्षीय सहकार्यमार्फत सांस्कृतिक तथा पर्यटन क्षेत्रमा धेरै गर्न सकिने विश्वास व्यक्त गरे।
 
चीनको कान्छु प्रदेशले कृषि उत्पादन र पर्यटन प्रवर्द्धन गरी राम्रो लाभ लिएको समेत सो अवसरमा जानकारी दिइएको थियो। नेपाल आउने स्याउमध्ये आधाभन्दा धेरै कान्छुबाट आउने गर्दछ।

भेटवार्तामा मुख्यमन्त्रीले नेपालको विकास प्रयासमा चिनियाँ सहयोग आवश्यक रहेको र खासगरी पूर्वाधार विकासमा चिनियाँ सहयोगले धेरै लाभ लिन सकिने बताए। स्याउ उत्पादन राम्रो रहेको र नेपाल आउने स्याउको ठूलो हिस्सा कान्छुबाट आएको जानकारी पाएपछि मुख्यमन्त्रीले नेपालको हिमाली क्षेत्रमा पनि स्याउको सम्भावना राम्रो रहेको र प्रविधि हस्तान्तरणको अपेक्षा गरे।