प्रदेशसभा बैठकमा मुख्यमन्त्री राउतले सकारे गल्ती ​

​​​​जनकपुरधाम- प्रदेश २ का मुख्यमन्त्री लालबाबु राउतले विगतको नीति तथा कार्यक्रम र बजेटजस्ता विषयमा गल्ती भएको स्वीकारेका छन् । साथै उनले ती गल्तीहरु सच्याउने प्रतिवद्धतासमेत व्यक्त गरेका छन् ।

मंगलबार विपक्षी दलका सांसदहरुले गरेको प्रश्नको जबाफ दिँदै मुख्यमन्त्री राउतले बजेट, नीति तथा कार्यक्रम, जनता आवासजस्ता कुरामा प्रदेश सरकारबाट गल्ती भएको बताए । अब आउनै लागेको बजेट र नीति तथा कार्यक्रममा सबै सदस्यलाई समेटेर जाने उनले प्रतिवद्धता जनाएका छन् ।

‘विगतमा बजेट तर्जुमा, नीति तथा कार्यक्रम जस्ता कुरामा हामीबाट गल्ती भएको छ,’ राउतले भने,‘कर्मचारी अभावले पनि कतिपय त्रुटिहरु हुन पुग्यो । विगतमा भएको गल्ती म स्वीकार गर्दछु ।’ संसद प्रतिपक्षको भएका भन्दै आगामी दिनमा प्रतिपक्षी दललाई समेत विश्वास लिएर अघि बढ्ने राउतले प्रतिवद्धता व्यक्त गरेका छन् ।

सरकारले विनियोजन गरेको बजेटमा अनियमितता र भ्रष्टाचार गरेको भन्दै विपक्षी दलका सांसदहरुले आरोप लगाएका थिए ।

प्रतिपक्षी दल नेपाली कांग्रेसका संसदीय दलका नेता रामसरोज यादवले विनियोजन गरिएको बजेटमा भ्रष्टाचार र अनियमितता गर्ने उद्देश्यले अर्बौं रुपैयाँ रकमान्तर गरिएको आरोप लगाएका थिए । प्रदेशसभाबाट पारित भइसकेका कार्यक्रमहरु आफूखुशी रकमान्तर गर्ने प्रवृत्ति नियन्त्रण गर्न यादवले सरकारसँग माग गरेका थिए ।

विशेष समय लिएर बोलेका सत्ताधारी दल राजपा सांसद मनिष सुमनले प्रदेशसभाको अवरुद्ध बैठक सञ्चालन गर्न योजनाको नाउँमा पैसा बाँडेको भन्दै सरकारको आलोचना गरे । विनियोजित भइसकेको बजेटबाट प्रतिपक्षी दललाई खुशी पार्न योजनाको नाउँमा पैसा बाँड्नु गलत रहेको उनको भनाइ थियो ।

नेकपाकी प्रदेशसभा सदस्य मन्जु यादवले स्थानीय तहमा विनियोजन भएको बजेट निर्वाचित सांसदलाई मात्र समेट्ने गरी सहमतिप्रति आपत्ति जनाउँदै समानुपातिक सांसदलाई हेला गरिएको आरोप लगाइन् ।

राजपाका प्रदेशसभा सदस्य विन्देश्वरप्रसाद साहले प्रदेशको नामाकरण, मलेठ घटनाको प्रतिवेदन सार्वजनिक गर्न नसक्नु सरकारको असफलता रहेको टिप्पणी गरे ।