मंगलसेन नगरपालिकाको गाडी अज्ञात समुहले जलायो 

धनगढी- अछामको मंगलसेन नगरपालिकाको गाडीमा अज्ञात समुहद्दारा आगजनी भएको छ ।

मंगलबार मध्यराति मेयर पदम बोहोराले चढ्ने बा १ झ ३३९४ नम्बरको जीपमा अज्ञात समुहले आगजनी गरेको हो । कार्यालय प्राङगणमा राखिएको गाडी आगजनीबाट जलेर पुर्णरुपमा नष्ट भएको छ ।

जिल्ला प्रहरी प्रमुख प्रहरी उपरीक्षक जनक शाहीले राती करिव दुई बजेतिर गाडीमा आगजनी भएको बताए । आगो लागेपछि गाडी लगातार पट्केको आवाज आएपछि प्रहरीलाई तुरुन्तै आगो नियन्त्रणमा लिन समस्या भएको शाहीले जानकारी दिए ।

गाडीमा आगजनी कसले गर्यो भन्ने बारे खुल्न सकेको छैन । करिव एक करोड २१ लाख बजेटमा फोर्ड कम्पनीको उक्त ईन्डोभर कार गत बर्ष खरिद गरिएको थियो ।

स्रोतका अनुसार नेत्र विक्रम चन्द समुहको नेकपा चन्दाको बिषयमा केही समय देखि मंगलसेन नगरपालिकासंग असन्तुष्ट बनेको र उक्त समुहले चन्दाकै बिषयमा जनप्रतिनिधिलाई कालोमोसो दल्ने योजनासमेत बुनेको बुझिएको छ । 

सुरक्षाका दृष्टिले गाडी पनि खतरामा रहेकाले सुरक्षित स्थानमा राख्न नगरपालिकालाई यस अघि नै सचेत गराईएको स्रोतले बतायो ।