'मिडियालाई निषेध गरेर ओली सरकार ज्ञानेन्द्र पथमा'

जनकपुर- नेपाली कांग्रेसका उपसभापति विमलेन्द्र निधिले सञ्चार जगतलाई निषेध गर्ने गरी मिडिया काउन्सिल विधेयक ल्याएर सरकार ज्ञानेन्द्र पथमा हिँड्न खोजेको आरोप लगाएका छन् ।

मिडिया काउन्सिल विधेयक प्रेस स्वतन्त्रता र अक्षुणतालाई समाप्त पार्ने लोकतन्त्रविरोधी विधेयक रहेको उनको भनाइ थियो । नेपाल प्रेस युनियन धनुषाले मंगलबार बिहान जनकपुरमा आयोजना गरेको पत्रकार सम्मेलनमा उपसभापति निधिले प्रेस काउन्सिल छँदाछँदै त्यसलाई विस्थापित गरेर सञ्चार मन्त्रालयको शाखाको रुपमा मेडिया काउन्सिल बनाउन खोजेको बताए ।

प्रमुख सरोकारबला रहेका पत्रकारहरुसँग सल्लाह गरी प्रेस काउन्सिललाई थप स्वायत्त बनाउनुपर्ने स्थानमा सरकारले निषेध गर्न खोज्नु दुर्भाग्यपूर्ण रहेको उनले बताए ।

‘मिडिया काउन्सिलको नाउँमा प्रेसको स्वतन्त्रतामाथि प्रहार गर्न खोजिएको छ,’ उपसभापति निधिले भने,‘पत्रकारलाई जेल र जरिवाना गर्ने प्रावधान अधिनायकवादबाहेक अरु केहि हुन सक्दैन् । लोकतन्त्रविरोधी यस्ता कार्यको हामी विरोध गर्दछौं ।’ स्वतन्त्र प्रेस उपरको प्रहारलाई नेपाली कांग्रेसले लोकतन्त्रमाथिको प्रहारको रुपमा लिएको उनले बताए ।

स्वतन्त्र प्रेसलाई बन्देज गर्ने गरी सरकारले संसदमा दर्ता गराएको मिडिया काउन्सिल विधेयकको लोकतन्त्रमा विश्वास राख्ने सबै दलले विरोध गर्नुपर्ने उनको भनाइ थियो ।

‘सरकारले स्वतन्त्र प्रेसमाथि अंकुश लगाउन खोेजेको छ,’ उनले भने,‘लोकतन्त्रमाथि विश्वास नगर्ने सरकारले पहिलो आक्रमण प्रेसमाथि गर्दछ, । मिडिया काउन्सिलको नाउँमा सरकारले अहिले सोही नमूना प्रस्तुत गरेको छ ।’ पूर्वराजा ज्ञानेन्द्रले नागरिकको स्वतन्त्रता अन्त्यगर्न पहिलो आक्रमण प्रेसमाथि नै गरेको उनले स्मरण गराए ।

उपसभापति निधिले कुनै बहानामा स्वतन्त्र प्रेसको अपहरण गर्न नमिल्ने भन्दै पत्रकार उपर अंकुश लगाउने गरी ल्याइएको विधेयक तत्काल फिर्ता लिन माग गरेका छन् । 

मिडिया काउन्सिलविरुद्ध पत्रकारहरुको आन्दोलनमा आफूहरुको पूर्ण समर्थन रहेको बताउँदै निधिले विधेयकविरुद्धको पत्रकारहरुको आन्दोलनमा सहयोग गर्न कार्यकर्ताहरुलाई निर्देशनसमेत दिएका छन् ।

साथै सञ्चार संस्था तथा पत्रकारमाथि कुनै बहानामा हुने आक्रमणको आफूहरु विरोधमा रहेको र यस्ता कार्यमा संलग्न व्यक्तिलाई तत्काल कानुनी दायरामा ल्याउन निधिले माग गरेका छन् ।