सेथुको जितका सावित्राको ह्याट्रिक

काठमाडौं- भारतीय महिला फुटबल लिग अन्तर्गत आफ्नो चौथो खेलमा नेपाली राष्ट्रिय महिला फुटबल टोलिकी स्ट्राइकर सावित्रा भण्डारीले ह्याट्रिक गरेकी छन् । कोल्हापुर सिटीलाई ९-० गोल अन्तरले पराजित गर्ने क्रममा सावित्राले ह्याट्रिक पुरा गरेकी हुन् । जारी लिगको सावित्राको यो दोस्रो ह्याट्रिक हो । यस ह्याट्रिकसँगै सावित्राको चार खेलमा गोल संस्या ९ पुगेको छ । 

खेलको चौंथो मिनेटमानै ग्रेसले गोल गर्दै सेथुलाई सुरुवाती अग्रता दिलाईन् । त्यसपछि खेलको १९ औं मिनेटमा ग्रसले नै पेनाल्टीमा गोल गर्दै सथुको अग्रता दोब्बर पारीन् । २३ औं मिनेटमा रतनबालाले गोल गर्दै अग्रता तेब्बर पारीन् । 

उनले सुमित्राको पासमा गोल गरेकी हुन् । २८ औं मिनेटमा रतनबालाले व्यक्तीगत दोस्रो गर्दै खेल ४-० को स्थितीमा पुर्याइन् । पहिलो हाफको इन्जुरी समयमा कोल्हापुर सिटीकी जबमनी टुडुले आत्मघाती गोल उपहार दिईन् । 

त्यस्तै दोस्रो हाफमा थप चार गोल गर्ने क्रममा दुबै गोल सावित्राले गरीन् । उनले खेलको ५६ औं मिनेटमा गोल गर्दै सेथुलाई ६-० गोल अन्तरको स्थितीमा पुर्याएकी थिइन् । त्यस्तै ६६ औ मिनेटमा सावित्राले व्यत्तिगत दोस्रो गोल गर्दै सेथलाई ७-० को अग्रता दिलाईन् । 

७६ औं मिनेटमा सावित्रले ह्याट्रिक पुरा गरिन् । ८१ औं मिनेटमा रतनबालाले ह्याट्रिक पुरा गर्दै सेथुलाई ९-० को जित दिलाईन् । यस जितसँगै सेथुको यो लगातार चौथो जित हो ।