उपाधिका लागि विभागीय डर्बीले भिड्ने

ताप्लेजुङ- तेस्रो संस्करणको पाथीभरा राष्ट्रिय पुरुष भलिबल प्रतियागिताको उपाधिका लागि दुई विभागीय डर्बी त्रिभुवन आर्मी क्लब र नेपाल पुलिस क्लब भिड्ने भएका छन् । 

बुधबार भएको दोस्रो सेमिफाइनल खेलमा एपीएफ क्लबलाई ३-१ को सेटमा पराजित गर्दै आर्मीले पुलिससागको भेट पक्का गरेको हो । पहिलो सेमिफाइनल खेलमा पुलिसले गण्डकी प्रदेशलाई ३-० को सोझो सेटमा पराजित गर्दै फाइनल पुगिसकेको थियो ।

आर्मीले एपीएफलाई सुरुवाती दुई सेटमा २५-२१, २५-२० पराजित गर्दा तेस्रो सेट २०-२५ ले गुमाउन पुगेको थियो । निकै नै प्रतिस्पर्धात्मक बेनेको चौथो सेटमा आर्मीले एपिएफलाई २६-२४ को सेटमा पराजित गर्दै फाइनल प्रवेश गरेको हो ।  

पछिल्लो पटक यि दुबै टोलीले आठौं राष्ट्रिय खेलकुदमा उपाधिका लागि भिडेका थिए । जहाँ आर्मीले पुलिसलाई पराजित गर्दै उपाधि जितेको थियो । प्रतियोगिताको विजेता टोलीले नगद ३ लाख ५१ हजार ५ सय प्राप्त गर्दा उपविजेताले १ लाख ७६ हजार नगद प्राप्त गर्ने छन् । 

त्यस्तै सेमिफाइनलमा पराजित दुई टोलीले नगद ५०-५० हजार पाउने छन् । प्रतियोगिताको सर्वोकृष्ट खेलाडीले १५ हजार तथा व्यक्तिगत विधामा उत्कृष्ट हुने सर्भर, डिफेन्डर, ब्लकर, क्विकर, स्पाइकर र प्रशिक्षकले समान ७-७ हजार पाउने छन् ।