नेपालले घरेलु मैदानमा त्रिकोणात्मक एकदिवसिय सिरिज खेल्ने

काठमाडौं- नेपाली राष्ट्रिय क्रिकेट टोलीले आफ्नो घरेलु मैदानमा त्रिकोणात्मक एकदिवसिय सिरिज खेल्ने भएको छ । अन्तर्राष्ट्रिय क्रिकेट परिषद् आईसीसीले पुरुष क्रिकेट विश्वकप लिग २ को खेल तालिका सार्वजनीक गरेसँगै नेपालले घरेलु मैदानमा पहिलो पटक त्रिकोणात्मक एकदिवसिय सिरिज खेल्न लागेको हो । 

तीन राष्ट्रले एक पटक कुनै एक राष्ट्रको घरेलु मैदानमा खेल्ने उक्त त्रिकोणात्मक एकदिवसिय सिरिजमा नेपालले युएस र ओमानसँग घर्लु मैदान कीर्तिपुरमा खेल्ने छ । उक्त नेपालको घरेलु मैदानमा हुने खेल भने २०२० को फेब्रुअरी ५ देखि १२ सम्म सञ्चालन हुनेछ ।

करिब साँढे दुई बर्ष सञ्चालन हुने प्रतियोगिता आगामी अगष्ट देखि सन् २०२२ को जनावरी सम्म चल्ने छ । घरेलु मैदानमा नेपालले एक दिवसीय सिरिज आयोजना गर्न लागेको यो पहिलो पटक हो । 

यस्तै नेपाल सन् २०२० को अप्रिलमा नामिबिया भ्रमणमा निस्कने छ । सो सिरिजमा नामिबिया, नेपाल र स्कटल्याण्डले त्रिकोणात्मक एकदिवसिय सिरिज खेल्ने छन् । लगत्तै, नेपाल जुनमा युएसए र पीएनजीबिरुद्दको सिरिज खेल्न पीएनजी प्रस्थान गर्नेछ । 

लिगमा नेपाल सहित नामिबिया, ओमान, पीएनजी, स्कटल्याण्ड, युएई र युएसए रहेका छन् । होम एण्ड अवे आधारमा खेलाइने लिगमा ७ राष्ट्रले १ सय २६ एकदिवसीय खेल खेल्ने छन् । खेल तालिका सार्वजनिक गरेपनि सबै खेलको खेल स्थान टुङ्गो लगाएको छैन ।