पिएम कप क्रिकेट जेठ पहिलो साताबाट

काठमाडौं- तेस्रो संस्करणको प्रधानमन्त्री कप राष्ट्रिय क्रिकेट प्रतियोगिता जेठ १ गतेबाट सुरु हुने भएको छ । राष्ट्रिय खेलकुद परिषद् (राखेप) र नेपालय इन्टरनेशनलको संयुक्त आयोजनामा हुने पिएमकप क्रिकेट जेठ १ देखि २४ गतेसम्म सञ्चालन हुनेछ । 
 
सात प्रदेश र तीन विभागीय टिम गरी १० टोलीले सहभागिता रहने छ । सहभागी १० टिमलाई दुई समूहमा विभाजन गरी राउन्डरोबिनको आधारमा खेल संचालन गरिने छ । समूहका शीर्ष दुई टोलीले सेमिफाइनलमा स्थान बनाउने छन् । 

प्रतियोगितामा दिनको एक खेल ५० ओभरको खेलाइने छ । १ करोड ७५ लाख रुपैयाँ खर्च लाग्ने अनुमान गरिएको प्रतियोगिताको विजेता टोलीले २० लाख प्राप्त गर्ने छ । त्यस्तै उपविजेताले १० लाख रुपैयाँ प्राप्त गर्नेछ ।

प्रतियोगितामा राष्ट्रिय टोलीका खेलाडीले अनिवार्य रुपमा सहभागीता जनाउनु पर्ने राष्ट्रिय खेलकुद परिषद्का सदस्य सचिव केशब कुमार बिष्टले बताए । राष्ट्रिय खेलाडीले प्रतियोगितामा कुनै जानकारी बिना प्रतियोगितामा सहभागी नभएको खण्डका त्यसको कारण माग्ने सदस्य बिष्टले बताए । 

प्रतियोगिताको उत्कृष्ट खेलाडीले मोटरसाईकल प्राप्त गर्नेछ । प्रतियोगिताको कुल खर्चमा ८० लाख परिषद्ले गर्ने छ भने बाँकी रकम नेपालय इन्टरनेशनलले खर्च गर्ने छ ।