मेसीको गोलमा ३ खेल अगावै बार्सा च्याम्पियन

काठमाडौं- तीन खेल अगावै स्पेनिस लिग फुटबलको उपाधि बार्सिलोनाले जितेको छ । शनिबार राति भएको खेलमा लेभान्तेलाई १–० ले हराउँदै बार्सिलोनाले उपाधि हात पारेको हो ।
 
बार्सालाई लिग उपाधि दिलाउन कप्तान लियोनल मेस्सीले निर्णायक गोल गरे । दोस्रो हाफमा परिवर्तित खेलाडीका रुपमा मैदान प्रवेश गरेका मेस्सीले ६२ औं मिनेटमा निर्णायक गोल गरेपछि लेभान्टेलाई १–० ले पराजित गर्दै बार्सिलोना यस सिजनको लालिगा च्याम्पियन बनेको हो ।

योसँगै बार्सिलोनाले २६औं पटक लालिगाको उपाधि उचालेको छ। मेस्सी भने बार्सिलोना १० औं पटक ला लिगाको उपाधि उचाल्ने पहिलो खेलाडी बने । शनिबार रातिको खेलपछि स्पेनिस लिग फुटबलको अंक तालिकामा बार्सिलोनाले ३५ खेलबाट ८३ अंक जोडेको छ । दोस्रो स्थानको एथ्लेटिको मड्रिडको ७४ अंक छ भने ६५ अंकको साथ रियाल मड्रिड तेस्रो स्थानमा छ ।

लिग उपाधिसँगै बार्सिलोनाले सिजनमा तीन उपाधि जित्ने सम्भावना बलियो पारेको छ । बार्सिलोना च्याम्पियन्स लिग फुटबलको सेमिफाइनलमा पुगेको छ भने कोपा डेल रे फुटबलको फाइनलमा पुगेको छ ।