पिएसजी सिजनको दोस्रो उपाधिका लागि भिड्दै

एजेन्सी- फ्रेन्स लिग वान क्लब पेरिस सेन्ट जर्मन (पिएसजी) जारी सिजनको दोस्रो उपाधिका लागि आज (शनिबार) राती रेनेससँग भिड्दै छ । खेल नेपाली समय अनुसार रेनेसको घरेलु मैदान स्टेड डी फ्रान्समा राती १२:४५ बजे सुरु हुने छ । 

पाँच खेल अगावै लिग वानको उपाधि जिती सकेको पिएसजी सिजनको दोस्रो उपाधिका लागि फ्रेन्च कपको फाइनलमा भिड्न लागेको हो । सोमबार मोनाकोलाई ३-१ ले पराजि गर्दै पिएसजीले लिग वानको उपाधि पाँच खेल अगावै जितेको थियो । 

घरेलु मैदानमा मोनाकोलाई पराजित गर्न युवा स्टार खेलाडी केलिएन एमबाप्पेले ह्याट्रिक पुरा गरेका थिए । उक्त खेलमा लामो समय चोटका कारण मैदान बाहिर रहेका ब्राजिलियन स्टार खेलाडी नेयमार मैदान फर्किएका थिए । 

आजको खेलमा नेयमार र एमबाप्पे पिएसजीका लागि मुख्य हतियार हुने छन् । नेयमार र एमबाप्पेले पिएसजीको अग्रपंक्ती सम्हाल्दै सिजनको दोस्रो उपाधि जिताउने प्रयास गर्ने छन् । 

तर, यता पिएसजीलाई रोक्दै सिजनको पहिलो उपाधि उचाल्ने दाउँमा रेनेस हुने छ । रेनेसले फ्रेन्च कपको उपाधि दुई पटक जित्दा चार पटक फाइनलमा पराजित भएको छ । यता पिएसजीले भने फ्रेन्च कपको उपाधि १२ पटक जितेको छ । पछिल्ला पाँच सिजन पिएसजीले लगातार उपाधिमाथी कब्जा गरेको छ । जुन पिएसजीको दबदबालाई रेनेस तोड्न चाहन्छ ।