लोकसभा निर्वाचन : कानुनले दोषी ठहर्‍याएका उम्मेदवारको बिगबिगी

नयाँँ दिल्ली – भारतमा १५ औं लोकसभाको तेस्रो चरणको निर्वाचन मिती नजिकिंदै जाँदा केही रोचक तथ्यहरु वाहिर आइरहेका छन्। ‘एसोसिएसन फर डेमोक्रेटिक रिफर्मस्’ (एडीआर) को प्रतिवेदनलाई उल्लेख गर्दै भारतीय पत्रिका दैनिक भास्करले एक अनुसन्धानबाट आउँदो अप्रिल २३ मा हुने निर्वाचनमा ३ सय ४० जना अपराधिक पृष्ठभूमिका उम्मेदवार चुनावी मैदानमा उत्रिएको तथ्य सार्वजनिक गरेको छ।

१ सय १६ स्थानमा हुन गइरहेको निर्वाचनमा ३ सय ४० अर्थात २१ प्रतिशत उम्मेदवार कुनै न कुनै जघन्य अपराधमा अदालतबाट दण्डित या आरोपित भएका प्रतिवेदनमा उल्लेख छ। यस्तै अर्को रोचक तथ्य के पनि छ भने, ३ सय ९२ जना उम्मेदवारहरु करोडपति रहेका छन्।
 
एडीआरले १ सय १६ निर्वाचन क्षेत्रका १ हजार ६ सय १२ उम्मेदवारमध्ये १ हजार ५ सय ९४ को विवरण अध्ययन गरेर सो निस्कर्ष निकालेको बताएको छ। 

यस्तै २९ जना उम्मेदवारलाई महिला हिंसासँग सम्बन्धित कसुरको आरोप रहेको पाइएको छ। जसअन्तर्गत बलात्कार, यौन उत्पिडनकासाथै महिलाहरु माथि क्रुर व्यवहार गरेको आरोपहरु रहेका छन्।
 
१४ उम्मेदवारले घोषित रुपमै आफुहरुले अदालतबाट फौजदारी अपराधमा सजाय भोगिसकेको भनी आफ्नो उम्मेदवारी विवरणमा उल्लेख गराएका छन्। १३ उम्मेदवार भारतीय दण्डसंहिता अन्तर्गतका धाराहरुका आधारमा मुद्दा समेत खेपिरहेका छन्।
 
३० प्रतिस्पर्धीहरुमाथि ज्यान मार्ने उद्योग र हत्या प्रयासको आरोप छ भने २६ उम्मेदवारमाथि जातीय, धार्मिक, साम्प्रदायिक, क्षेत्रीय एवं लैंगिक आधारमा घृणा फैलाउने भाषण दिएको आरोप छ।