तीव्रगतिको आँधीका कारण भारतमा ३५ जनाको मृत्यु 

नयाँ दिल्ली – भारतको विभिन्न राज्यमा मंगलबार राति बेमौसमको वर्षापछि आएको धूलो सहितको आँधीमा परी कम्तीमा ३५ जनाको मृत्यु भएको छ। स्थानीय सञ्चार माध्यमकाअनुसार राजस्थान राज्यमा परेको चट्याङका कारण चार बालबालिका सहित ११ जनाको मृत्यु भएको छ। 

त्यसैगरी पश्चिम राज्य गुजरातको कैयौं जिल्लामा आएको धूलो सहितको आँधीमा परी कम्तीका नौ जनाको मृत्यु भएको छ।  भारतको गुजरात र अहमदाबाद राजकोट, पटना लगायत अन्य कैयौं जिल्लाहरु यस आँधीका कारण प्रभावित भएका छन्। 

बेमौसमी वर्षा र आँधीको कारण मध्य प्रदेश र राजस्थानका विभिन्न भागमा भएको जनधनको क्षतिप्रति भारतीय प्रधानमन्त्री नरेन्द्र मोदीले गहिरो दुःख व्यक्त गरेका छन्। प्रकोपमा परी ज्यान गुमाउने व्यक्तिका परिवारलाई क्षतिपूर्ति स्वरुप २ लाख भारतीय रुपैयाँ र घाइतेलाई ५० हजार रुपैयाँ राष्ट्रिय कोषबाट तत्काल उपलब्ध गराइने प्रधानमन्त्री मोदीले बताए।