वीरगंजमा ६ किलोमिटर सडक कालोपत्रे गरिने

वीरगंज – वीरगंज महानगरपालिका अन्तर्गतको दुईवटा वडामा प्रदेश सरकारको लगानीमा करिब छ किलोमिटर सडक स्तरोन्नती को साथै कालोपत्रे गरिने भएको छ।

प्रदेश २ को सरकारले सडक निर्माणको लागी ८ करोड रुपैयाँ विनियोजन गरेको छ। वीरगंज महानगरपालिका वडा नम्बर १५ लक्ष्मनवामा ३ दशमलव ४६ किलोमिटर र नगवाको गणेश टोलमा  २ दशमलव ३१ किलोमिटरको कालोपत्रे गरिन लागेको हो।

यो मध्ये गणेश टोलमा वर्षातको समयमा पानीको बहाव थुनिएर महिना दिनसम्म डुबानको अवस्था देखिने गरेको छ।

लक्ष्मणवाको सडकको लागी ५ करोड ८ लाख ६४ हजार रुपैयाँ विनियोजन गरिएको भौतिक पूर्वाधार विकास कार्यालय वीरञ्जका इन्जियिनर सन्जय साहले बताए। 

यो सडकको निर्माण कार्य १५ महिना भित्र निर्माण कार्य पुरा गर्ने शर्तमा ठेक्का सम्झौता गरिएको छ। साढे ५ मिटर फराकिलो सडक लक्षमणवाको भेडियाहीस्थित हरिहर साह विद्यालय हुँदै जिल्ला आयुर्वेद कार्यालय भवन कालोपत्रे निर्माण गरिनेछ।

सडकमा करिब १ किलोमिटर सम्म ढलान र बस्ती आसपासमा नाला समेत निर्माणको योजना रहेको इन्जिनियर साहले जानकारी दिएका छन्। लक्ष्मणवाको सडक निर्माण गर्ने जिम्मा महादेव खिम्ती–सन्तोष जेभी वीरगंजलाई दिइएको छ।

नगवाको गणेश टोलमा २ करोड ९१ लाख ९० हजार रहेको रुपैयाँमा २०७६ को चैतसम्ममा पुरा गर्ने शर्तमा ठेक्का सम्झौता गरिएको कार्यालयले जानकारी दिएको छ। नगवाको सडकको ठेक्का आश्रय–अंकित जेभीले पाएको छ।