प्रस्तावित सर्वोच्चका न्यायाधीशविरुद्ध उजुरी आह्वान

काठमाडौं- संसदीय सुनुवाई समितिले सर्वोच्च अदालतका पाँच प्रस्तावित न्यायाधीशविरुद्ध उजुरी आह्वान गरिएको छ।
 
चैत १९ गते मंगलबार न्यायपरिषद्बाट सिफारिस भएका पाँच जना प्रस्तावित न्यायाधीशविरुद्ध वैशाख २ गते सम्म उजुरी दिन आह्वान गरेको हो । समितिका अनुसार उजुरी आज शुक्रबारबाट लिन सुरु गरिएको छ ।
 
समितिको फोन नम्बर ०१ ४२००२७७ मा फोन गरेर वा parl_hearingcommittee@parliament.gov.np मा इमेल गरेर उजुरी दिन सकिनेछ । सूचना दिने व्यक्तिले आफ्नो नाम, थर र वतन खुलाउनुपर्नेछ । तर सूचना दिने व्यक्तिले नाम खुलाउन नचाहे नाम गोप्य राखिने समितिले जनाएको छ ।

न्यायपरिषद्ले उच्च अदालत पाटनका मुख्य न्यायाधीश प्रकाश ढुंगाना, उच्च अदालत सुर्खेतका मुख्य न्यायाधीश सुष्मालता माथेमा, कानून व्यवसायीबाट मोरङका पूर्व महान्यायाधिवक्ता हरि फुँयाल, काठमाडौंबाट वरिष्ठ अधिवक्ता कुमार रेग्मी र अधिवक्ता डा. मनोजकुमार शर्माको नाम सर्वोच्च अदालतका न्यायाधिशका लागि सिफारिस गरेको थियो।