तराईमा फेरि हावाहुरी आउने खतरा, देशभर मेघ गर्जनसहित वर्षा

काठमाडौं- तराई क्षेत्रमा पुनः ठूलो हावाहुरी आउन सक्ने मौसमविद्हरुले चेतावनी दिएका छन् । 

मौसममा देखिएको बदलावसँगै तराईका सिमाना र पश्चिमी पहाडका थोरै ठाउँमा हावाहुरीको संभावना रहेको मौसम पूर्वानुमान महाशाखाले जनाएको हो । मौसमविद् विभुति पोखरेलका अनुसार तराईको सिमा क्षेत्रमा दिउँसो तिर हावाहुरी आउने सम्भावना देखिएको छ । उनले सावधानी अपनाउन समेत अपिल गरेकी छिन् । 

पूर्वमा न्यूनचापीय क्षेत्र, पश्चिमी वायु, बंगालको खाडीबाट आएको जलवाष्पयुक्त हावा र स्थानीय वायुको प्रभावले देशभरीकै मौसम बदली भएको मौसमविद् पोखरेलले जानकारी दिइन । मौसममा देखिएको बदली आज र भोलि शनिबारसम्म कायम रहने मौसम पूर्वानुमान महाशाखाले जनाएको छ ।

धेरै ठाउँमा मेघ गर्जनसहित पानी पर्ने छ केहि स्थानमा हावाहुरीसहित पानी पर्ने सम्भावना छ । काठमाडौं उपत्यकामा पनि मेघ गर्जन सहित पानी पर्ने जनाइएको  छ।
 
यस्तै आज देशका धेरै ठाउँमा मेघगजनसहित पानी पर्दा उच्च हिमाली र पहाडी भेगमा हिमपात समेत हुने मौसमविद् पोखरेलले जानकारी दिइन । मौसममा देखिएको बद्लाव आइतबारबाट सुधार हुने महाशाखले जनाएको छ ।