दिल्ली पराजित, सन्दीपको एक विकेट

एजेन्सी- नेपाली राष्ट्रिय टोलीका लेग स्पिनर सन्दीप लामिछाने सम्मिीलित दिल्ली क्यापिटल्स इन्डियन प्रिमियर लिग (आइपिएल) क्रिकेटमा पराजित भएको छ । बिशिबार राती भएको खेलमा सनराइजर्स हैदरावादसँग ५ विकेटले पराजित भएको हो ।

दिल्लीले दिएको १ सय ३० रनको लक्ष्य पछ्याएको हैदरावादले १८.३ ओभरमा मात्र ५ विकेट गुमाएर लक्ष्य पुरा गर्यो । हैदरावादका लागि जोनी बेर्सस्टोले सर्वाधिक ४८ रन जोडे । उनले २८ बलमा ९ चौका र १ छक्का प्रहार गरे । 

त्यस्तै मोहमद नाबीले १७, विजय शंकरले १६, तथा डेभिड वार्नर, दिपक होडा र मनिस पाण्डेले समान १०-१० रन जोडे । दिल्लीका सन्दीप लामिछाने, कागीसो राबडा, अक्षर पटेल, राहुल टेवाटिया र इशान्त शर्माले एक एक विकेट लिए ।

हैदरावादविरुद्ध सन्दीपले ४ ओभर बलिङ गर्दै ३२ रन खर्चिएर १ विकेट लिएका हुन् । हैदरावादसँगको विकेटसँगै सन्दीपले यस सिजनको ३ खेलमा ४ विकेट लिएका छन् । 
यसअघि टस हारेर पहिले ब्याटिङ गरेको दिल्लीले निर्धारित २० ओभरमा ८ विकेट गुमाएर १ सय २९ रन बनाएको थियो । 

दिल्लीका लागि कप्तान श्रेयस एयरले सर्वाधिक ४३ रन जोडे । अक्षर पटेलले २३, क्रिस मोरिसले १७, शिखर धवनले १२ र पृथ्वी शाहले ११ रन जोडे । हैदरावादका भुवनेश्वर कुमार, मोहमद नाबी सिद्धार्थ कउलले २-२ विकेट लिए ।  

जितसँगै हैदरावादले ४ खेलमा ३ जितसहित ६ अंक जोडेर अंक तालिकाको शीर्ष स्थानमा उक्लिएको छ । यता दिल्लीको यो तेस्रो हार हो । पाँच खेलमा २ जित निकाल्दै ४ अंक जोडेको दिल्ली पाँचौ स्थानमा छ ।