मैले सफलता पाउँदा पनि मानिसहरु कृतघ्न भए : ओसाका

काठमाडौं– जापानी टेनिस स्टार नोओमी ओसाकाले आफ्नो सफलताको कदर गर्न नसकेर मानिसहरु कृतघ्न भएको बताएकी छन्। विश्व वरीयताकी नम्बर दुई ओसाकाले सिनसिनाटीमा अमेरिकी प्रतिद्वन्दी कोको ग्वफलाई बुधबार हराएपछि यस्तो बताएकी हुन्।

उनले गएको मे मा फ्रेन्च ओपनबाट आफ्नो नाम फिर्ता लिएको कारणबारे पनि कुरा गरेकी छन्। उनले प्रतियोगिताको संघारमा मिडियाले आफ्नो दिमागी स्वास्थ्यमा प्रतिकूल प्रभाव पारेको पनि जनाएकी छन्।

‘म छक्क पर्छु कि के कुराले असर गरिरहेको छ, जसले मलाई मिडियासँग साक्षात्कार गर्न रोकिरहेको छ,’ उनले भनिन्, ‘कुनै कुनै बेला म यस्तो हेडलाइन देखेर हैरान हुन्छु कि खेलाडीले हारिरहेका हुन्छन् तर भोलिपल्ट हेडलाइन हुन्छ ‘कोल्याप्स’ वा उनीहरु पहिलेका जस्तो महान् रहेनन्।’

कुनै खेलाडी मैदानमा जानु, खेल्नु, त्यहाँ समर्थक उपस्थित हुनु र तपाईं खेलेको हेर्न समर्थक आउनु नै उपलब्धि भएको ओसाका बताउँछिन्। तर यहि कुरा कहिलेबाट संवेदनशिल हुन लाग्यो आफूलाई थाहा नभएको उनको भनाइ छ। ‘उपलब्धिबाट सबै कुरा सुरु हुँदैन,’ उनले भनिन्।

२३ वर्षे जापानी स्टारले फ्रेन्च ओपनपछि विम्बल्डनबाट पनि आफ्नो नाम फिर्ता लिएकी थिइन्। उनले एन्जाइटी र डिप्रेसनबाट बच्नका लागि आफ्नो नाम फिर्ता लिएको बताएकी छन्।

उनले सिनसिनाटीमा ४–६ ले पछि परेको अवस्थाबाट ६–३ र ६–४ को जित निकालेकी थिइन्। उनको विचारमा कोभिड–१९ को महामारी पनि मानसिक स्वास्थ्यलाई प्रभाव पार्ने तत्व हो।