बक्सिङ प्रतियोगिताका लागि नेपालका ६ खेलाडी यूएईमा

काठमाडौं- एएसबीसी जुनियर तथा युथ वोइज एण्ड गल्स बक्सिङ प्रतियोगितामा सहभागि हुन नेपाली टिम युएई पुगेको छ।

बुधरबार राति नेपाली बक्सिङ टोलीलाई नेपाल बक्सिङ्ग संघका अध्यक्ष राम अवालेले त्रिभुवन अन्तर्राष्ट्रिय विमानस्थलमा विदाई गरेका थिए।

आउँदो अगस्त २० देखि ३१ सम्म दुबईमा हुन गइरहेको बक्सिङ प्रतियोगितामा नेपालका ६ खेलाडीले प्रतिस्पर्धा गर्नेछन्।

नेपाली प्रतिस्पर्धिमा जुनियरतर्फ ५४ केजी तौल समूहमा छिरिङ वाङदी शेर्पा र महिला ५० केजीमा स्वस्तिका तिरुवाले प्रतिष्पर्धा गर्दैछन्।

त्यसैगरी युथ तर्फ पुरुष ५४ केजी तौलमा सुलभ माली, ६० केजी तौल समूहमा ईन्द्र बहादुर सुनार, ७१ केजीमा सुदेन गिरी साथै महिला ५७ किलो तौलमा नारिका राईले प्रतिष्पर्धा गर्दै छन्।

जुनियर तथा युथका ६ खेलाडीसहित ५ जना अफिसियल गरी ११ सदस्यीय नेपाली बक्सिङ टोली बुधबार दुबई प्रस्थान गरेको हो।

२०७६ मा नेपालमै सम्पन्न १३औं दक्षिण एसियाली खेलकुद (साग) मा  बक्सिङले तीन स्वर्ण ६ रजत र ६ कास्य गरी १५ पदक जितेको थियो।

त्यसलाई सम्झँदै संघका अध्यक्ष अवाले फेसबुकमा लेख्छन्, ‘अहिले मात्र आएर बिस्तारै स्तरोन्नती गरिरहेको बक्सिङ्ग खेलको झण्डै ३६ वर्ष लामो ईतिहासमा नयाँ आयाम थप्दै १३औं दक्षिण एशियाली खेलकुदमा धेरै पदक जितेर प्रमाणित गरि सकेको छ।’