संजोक राई थ्रिस्टारमै बस्ने पक्का

काठमाडौं- पछिल्लो सहिद स्मारक ए डिभिजन लिगमा पहिलो ह्याट्रिक गरेका संजोक राई आउँदो लिगमा पनि थ्रिस्टार क्लबमै बस्ने भएका छन्।

११ नम्बरमा खेल्ने खेलाडीले थ्रीस्टारसँग सम्झौता नविकरण गरेका हुन्। राष्ट्रिय टिमको बन्द प्रशिक्षणमा रहेका राई दोस्रो चरणको छनोटबाट बाहिरिएका थिए।

संजोकले गएको चैतमा नेपालमै भएको थ्रि नेसन्स कपको फाइनल खेलमा गोल गर्दै नेपाललाई जित दिलाएका थिए।

बंगलादेशविरुद्धको सो फाइनल खेलमा उनीसँगै विसाल राईले पनि गोल गरेका थिए।

थ्रीस्टारले यसअघि राष्ट्रिय टिमको डिफेन्डर अनन्त तामाङसँगै पनि सम्झौता नविकरण गरेको थियो। त्यस्तै उसले केही समययता नेपालमा खेलिरहेका अफ्रिकन रुट्सका डिफेन्सिभ मिडफिल्डर राफेन विडियासलाई पनि क्लबमा भित्र्याएको थियो।

थ्रिस्टारले यसबाहेक मनग्य नकर्मी, विक्रम लामा, आयुष घलान, निशान खड्का, डोना थापा, मिक्छेन तामाङ, सुसान श्रेष्ठलगायतका खेलाडी अनुबन्ध गरिसकेको छ।

क्बले राष्ट्रिय टिमका फरवार्ड मनिष डाँगीलाई यसपहिले क्लबमा अनुबन्ध गरे पनि निरन्तरता दिन सकेको थिएन। डाँगीलाई अहिले मछिन्द्र क्लबमा अनुबन्ध भइसकेका छन्। क्लबले मूख्य प्रशिक्षकको जिम्मेवारी थ्रिस्टारकै पूर्वखेलाडी उर्जन श्रेष्ठलाई दिएको छ।