जातीय विभेदको मुद्दा लागेका वडाध्यक्ष १ लाख १० हजार धरौटीमा छुटे

सुर्खेत– जुम्लाको सिंजा गाउँपालिका–६ का वडाध्यक्ष कालीबहादुर बुढा र उनका छोरा नवीन बुढा धरौटीमा छुटेका छन्। वडाध्यक्ष १ लाख १० हजार र छोरा नवीन १ लाख धरौटीमा छुटेका हुन्। 

जातीय विभेदको मुद्दा लागेका वडाध्यक्षका बाबुछोरालाई जुम्ला जिल्ला अदालतले धरौटीमा छोड्न आदेश गरेको हो। अदालतका न्यायाधीश शिवप्रसाद खनालको इजलासले धरौटीमा छाड्न आदेश दिएको अदालतका निमित्त श्रेस्तेदार तथा सूचना अधिकारी चेतराज पन्तले बताए।

असार २५ गते जुम्लाको सिंजा गाउँपालिका–६ काँडागाउँका विवेन्द्र नेपालीले वडाध्यक्ष र उनका छोरा नवीनविरुद्ध प्रहरी कार्यालयमा जातीय विभेदको मुद्दा हालेका थिए। यातायात, खानेपानी लगायतका विषयमा वडाध्यक्षले सञ्चारमाध्यमलाई दिएको अन्तर्वार्तामा टिप्पणी गरेपछि असार ८ गते वडाध्यक्ष र उनका छोराले अपशब्द प्रयोग गरी गालीगलौज तथा कुटपिट गरेका थिए। घटना भएको १७ दिनपछि दलित अधिकारकर्मीहरुको सहयोगमा पीडितले जिल्ला प्रहरी कार्यालय जुम्लामा जातिय विभेदको मुद्दा दर्ता गराएका थिए।

अदालतले असार २७ गते वडाध्यक्ष र उनका छोराको नाममा पक्राउ पुर्जी जारी गरेको थियो। वडाध्यक्षका छोरा साउन १८ गते पक्राउ परेका थिए भने वडाध्यक्ष पक्राउ परेका थिएनन्।

मंगलबार वडाध्यक्षले आफैं उपस्थित भएर धरौटी रकम बुझाएर फर्किएको अदालतले जनाएको छ। धरौटी रकम बुझाएसँगै थुनामा रहेका वडाध्यक्षका छोरा पनि रिहा भएका छन्।