भारतका दुई लडाकु विमान खसाएको पाकिस्तानको दाबी

काठमाडौं : पाकिस्तानी सेनाले भारतका दुईवटा लडाकु विमानलाई खसालिएको दाबी गरेपछि भारत पाक तनावले नयाँ मोड लिएको छ।

बीबीसीका अनुसार पाकिस्तानी सेनाका प्रवक्ता मेजर जनरल आसिफ गफूरले ट्‌वीट गर्दै भारत-पाकिस्तान वायु सिमा क्रम गरेर पाकिस्तानी आकाशमा छिरेका ती भारतीय विमानलाई पाकिस्तानी वायुसेनाले खसालिदिएको दाबी गरेका हुन्।

पाकिस्तानी सेनाले एक भारतीय विमानचालकलाई पक्राउ गरिएको जनाएको छ। पाकिस्तानी वायुसेनाले कारबाही गरेपछि एउटा विमान पाकिस्तान प्रशासित कश्मीर र अर्को भारत प्रशासित कश्मीरमा खसेको उनले दाबी गरे।

भारतीय सञ्चारमाध्यमहरूले भारतीय वायुसेनाका ती विमानमा प्राविधिक समस्या भएको र पाकिस्तानले दाबी गरेजस्तो नभएको जनाएका छन्।