धनगढीलाई विराटनगरको १०४ रनको लक्ष्य

धनगढी- विराटनगर किङ्सले धनगढी प्रिमियर लिग (डिपिएल) क्रिकेटमा धनगढी स्टार्सलाई जितका लागि १ सय ४ रनको लक्ष्य सुम्पेको छ । टस जितेर पहिले ब्याटिङ गर्ने निर्णय गरेको विराटनगरले निर्धारित २० ओभरमा ९ विकेट गुमाउँदै १ सय ३ रन जोडेको हो । 

विराटनगरका सुरुवाती ५ ब्याट्सम्यान क्रिजमा टिक्न सकेनन् । जहाँ अभिनाश यादवले २७ र कप्तान करन केसीले २१ रन जोड्न बाहेक अन्य ब्याट्सम्यानले धनगढीका बलर सामु खुलेर खेल्न सकेनन् ।

आसिफ सेखले १२ रन र साम्सद सेखले ११ रन जोड्दा अन्य ब्याट्सम्यानले दोहोरो अंक छुन सकेनन् । त्यस्तै कुसल भुर्तेल ६, हरिशंकर शाह २, पृथु बास्कोटा ६, असाद उल्ला खान ३ र राजेश पुलामी मगर १ रन जोड्दै पेभिलिएन फर्कीए । सुसन भारी १ रनमा अविजित रहे ।

धनगढीका लागि विराटनगरलाई सस्तैमा समेट्न कप्तान सोमपाल कामी र विपिन कार्कीले समान तीन विकेट लिए । त्यस्तै रोबीन क्षेत्रीले दुई तथा सुनिल धमलाले एक विकेट लिए ।