काठमाडौंको लगातार जित, महेन्द्रनगरको दोस्रो हार

धनगढी- अंकित दवासको उत्कृष्ट ब्याटिङ र रसिद खानको बलिङको मद्दतले काठमाडौंले लगातार दोस्रो जित निकालेको छ । बुधबार फाप्ला क्रिकेट मैदानमा भएको खेलमा महेन्द्रनगर युनाइटेडलाई ७ रनले पराजित गर्दै काठमाडौंले लगातार दोस्रो जित निकालेको हो । 

काठमाडौंले दिएको १ सय ३५ रनको लक्ष्य पछ्याएको महेन्द्रनगरले २० ओभर खेल्दै ८ विकेट गुमाएर १ सय २७ रन मात्र बनाउन सक्यो । खराव सुरुवात गरेको महेन्द्रनगरका लागि अमरसिंह रौटेलाले २ चौका प्रहार गर्दै २८ रनको अविजित पारी खेले । 

त्यस्तै कप्तान शरद भेषवाकरले २३, आरिफ सेखले १८, आनन्द सुब्रमनियमले १५ र राहित कुमार पौडेलले १० रन बनाउन बाहेक अन्य ब्याट्सम्यानले दोहोरो अंक छुन सकेनन् ।
 
काठमाडौंका लागि रासिद खानले तीन तथा अंकित दवासले दुई विकेट लिए । त्यस्तै योगेन्द्रसिंह कार्की, ललित राजवंशी र नन्दन कुमार यादवले एक एक विकेट लिए । 

यसअघि टस हारेर पहिले ब्याटिङको निम्तो पाएको काठमाडौंले निर्धारित २० ओभरमा ५ विकेट गुमाउँदै १ सय ३४ रन जोडेको थियो । काठमाडौंका लागि अंकितले अर्धशतकीय अविजित पारी खेलेका थिए । दवासले ५५ बल खेल्दै ५ चौका र ३ छक्का प्रहार गरे । 

योगेन्द्र सिंह कार्कीले २२, कप्तान ज्ञानेन्द्र मल्लले १२ र मेहबुब आलमले १३ रन जोडे भने अन्य ब्याट्सम्यानले दोहोरो अंक छुन सकेनन् । महेन्द्रनगरका लागि अमरसिंह रौटेलाले दुई तथा मोहमद नाभिदले, अभिनास बोहरा र सागर ढकालले एक एक विकेट लिएका थिए ।