काठमाडौंले दियो महेन्द्रनगरलाई १३५ रनको लक्ष्य

धनगढी- अंकित दवासको अर्धशतकको मद्दतले काठमाडौं गोल्डेन्सले शरद भेषवाकरको कप्तानीमा रहेको महेन्द्रनगर युनाइटेडलाई १ सय ३५ रनको लक्ष्य सुम्पेको छ । टस हारेर पहिले ब्याटिङको निम्तो पाएको काठमाडौंले निर्धारित २० ओभरमा ५ विकेट गुमाउँदै १ सय ३४ रन जोड्यो । 

काठमाडौंका लागि अंकितले अर्धशतकीय अविजित पारी खेलेका हुन् । यससँगै दवास जारी डिपिएलमा अर्धशतक प्रहार गर्ने दोस्रो खेलाडी बने । यसअघि धनगढीका अमित श्रेष्ठले पहिलो खेलमा अर्धशतक प्रहार गरेका थिए । 

दवासले ५५ बल खेल्दै ५ चौका र ३ छक्का प्रहार गरे । योगेन्द्र सिंह कार्कीले २२ रन जोडे । उनले १४ बल खेल्दै एक छक्का र एक चौका प्रहार गरे । त्यस्तै कप्तान ज्ञानेन्द्र मल्लले १२, मेहबुब आलमले १३, अनिल शाह ६ तथा गौरभ तोमर र सोनु तामाङले समान एक एक रन जोडे । 

महेन्द्रनगरका लागि अमरसिंह रौटेलाले दुई तथा मोहमद नाभिदले, अभिनास बोहरा र सागर ढकालले समान एक एक विकेट लिए ।