रुपन्देहीको लगातार दोस्रो जित, विराटनगरको हार

धनगढी- रुपन्देही च्यालेन्जर्सले धनगढी प्रिमियर लिगमा लगातार दोस्रो जित दर्ता गरेको छ । आफ्नो दोस्रो खेलमा विराटनगर किङ्सलाई ५ विकेटले पराजित गर्दै रुपन्देहीले प्रतियोगितामा लगातार दोस्रो जित दर्ता गरेको हो । 

विराटनगरले दिएको ९३ रनको सामान्य लक्ष्य पछ्याएको रुपन्देहीले १३.१ ओभरमा ५ विकेटको क्षतीमा लक्ष्य भेट्टायो । खराव सुरुवात गरेको रुपन्देहीका लागि पुनित मेहराले सर्वाधिक ४६ रन जोडे । 

उनले २७ बल खेल्दै २ चौका र ४ छक्का प्रहार गरे । त्यस्तै बाबर हायातले १७, भिम सार्कीले १२, कप्तान बसन्त रेग्मीले ८, विनोद भण्डारीले ७, प्रदिप ऐरीले २ र सन्दीप सुनार शुन्य रनमा आउट भए । विराटनगरका लागि अभिनास यादवले दुई तथा कप्तान करन केसी, सुसन भारी र साम्सद सेखले समान एक एक विकेट लिए । 

यसअघि टस जितेर पहिले ब्याटिङ गरेको विराटनगर किङ्सले २० ओभर खेल्दै ९ विकेटको क्षेतिमा ९३ रन बनाएको थियो । विराटनगरका कुनै ब्याट्सम्यान रुपन्देहीका बरल सामु खुलेर खेल्न सकेका थिएनन् । 

विराटगरका असद उल्ला खानले १८, राजेस पुलामिले १५, कुशल भुर्तेलले १२, साम्सद सेखले १० रन जोड्न बाहेक अन्य ब्याट्सम्यानले दोहोरो अंक छुन सकेनन् । त्यस्तै सुवास एरले ९, आसिफ सेखले ८, अविनास यादवले ७ , पृथु बास्कोटाले ४, कप्तान करण केसीले मात्र २ तथा ओपनरमा आएका हरिसंकर शाहा शुनय रनमा पेभिलिएन फर्किएका थिए । 

रुपन्देहीका लागि पुनित मेहेराले सर्वाधिक ३ विकेट लिए । त्यस्तै ललित भण्डारी र बसन्त रेग्मीले समान २-२ विकेट लिँदा कृष्ण कार्की र बिक्रम सोबले १-१ विकेट लिए । बुधबार बिहान ९ बजे हुने खेलमा पहिलो खेलमा शरद भेषवाकरको कप्तानीमा रहेको महेन्द्रनगर युनाइटेले काठमाडौं गोल्डेन्सको सामना गर्ने छ । त्यस्तै दिउँसो १ बजे हुने दोस्रो खेलमा विराटनगर किङ्सविरुद्ध धनगढी स्टार्स भिड्ने छ ।