अत्तरियाका भुवन चम्केपछि धनगढीको लगातार दोस्रो हार

धनगढी- सिवासी अत्तरियाका भुवन कार्की चम्केपछि आयोजक टोली धनगढी स्टार्स तेस्रो संस्करणको धनगढी प्रिमियर लिग (डिपिएल) टी-२० क्रिकेटमा लगातार दोस्रो हार व्यहोरेको छ । 

अत्तरीयाका लागि भुवनले ४ विकेट लिँदै स्टार्सलाई सस्तैमा समेट्न महत्वपूर्ण भुमिका खेलेका हुन् । उनले चार ओर गर्दै मात्र १० रन खर्चेर ४ विकेट लिएका हुन् । यससँगै अत्तरियाले स्टार्सलाई ५ रनले पारजित गरेको हो ।

अत्तरियाले दिएको ९६ रनको सामान्य लक्ष्य पछ्याएको स्टार्सले २० ओभर खेल्दै ९ विकेट गुमाएर ९० रन मात्र बनाउन सक्यो । खराब सुरुवात गरेको स्टार्सका लागि राजु रिजाल २४, रोहन मुस्तफ १८, सन्दीप रजाली ११, कप्तान सोमपाल कामी १० रन बाहेक अन्य ब्याट्सम्यानले दोहोरो अंक छुन सकेनन् । 

जहाँ पवन सराफ, सौरभ खनाल र अमित श्रेष्ठ शुन्य रनमा पेभिलियन फर्किदा रोविन श्रेत्री २ रन तथा ओपनर सुनिल धमला र आमिर हायात समान ४ रनमा आउट भए । अत्तरीयाका लागि भुवन कार्कीले चार विकेट लिँदा सन्नी पटेल दुई तथा दिपेन्द्र सिंह ऐरी र दिपेन्द्र रावतले एक एक विकेट लिए । 

यसअघि टस जितेर पहिले ब्याटिङ गरेको अत्तरियाले निर्धारित २० ओभरमा ५ विकेट गुमाउँदै ९५ रन जोडेका थियो । अत्तरियाका लागि सन्नी पटेलले ३५ तथा जय किसन कोल्सवालाले २१ रन जोड्न बाहेक अन्य ब्याट्सम्यानले उल्लेख्य प्रदर्शन गर्न सकेका थिएनन् । 

सन्नीले २८ बल खेल्दै २ चौका र २ छकका प्रहार गरे । त्यस्तै कोल्सावालाले २६ बल खेल्दै १ चौका र एक छक्का प्रहार गरे । अन्य खेलाडी प्रेम तामाङले १२, कप्तान दिपेन्द्र सिंह ऐरी ११, सुभेन्दु पाण्डेय ३ र सन्दीप जोरा २ रनमा पेभिलियन फर्किए । 

स्टार्सका लागि रोहन मुस्तफाले दुई तथा बिपिन खत्री, कप्तान सोमपाल कामी, आमिर हायातले एक विकेट लिए । स्टार्सले आफ्नो पहिलो खेल काठमाडौं गोल्डेन्ससँग ४ विकेटले पराजित भएको थियो ।