धनगढीलाई पराजित गर्दै काठमाडौंको सुखद सुरुवात

धनगढी- तेस्रो संस्करणको धनगढी प्रिमयर लिग (डिपिएल) टी-२० क्रिकेटमा काठमाडौं गोल्डेन्सले सुखद सुरुवात गरेको छ । सोमबारबाट सुरु भएको प्रतियोगितामा घरेलु टोली धनगढी स्टार्सलाई ४ विकेटले पराजित गर्दै सुखद सुरुवात गरेको हो ।

घरेलु टोली स्टार्सले दिएको १ सय ३३ रनको लक्ष्य पछ्याएको काठमाडौंले १९.५ ओभरमा ६ विकेट गुमाउँदै उक्त लक्ष्य भेट्टायो । काठमाडौंका लागि अंकित दवासले २९ रन जोडे । उनले दुई चौका र दुई छक्कका प्रहार गर्दै २९ रन जोडेका हुन् । त्यस्तै गौरभ तोमरले २८ रन जोडे । 

निकै नै आक्रमक सुरुवात गरेका तोमरले तीन चौका र एक छक्का प्रहार गरे । अनिल साहाले २४, बिक्रम भुसालले १४ र महबुब आलमले १२ रन जोडे । अन्य ब्याट्सम्यानले भने दोहोरो अंक छुन सकेनन् ।  स्टार्सका लागि रोमन मुस्तफाले चार तथा विपिन कार्कीर आमिर हायातले एक विकेट लिए ।

यसअघि टस हारेर पहिले ब्याटिङको निम्तो पाएको स्टार्सले निर्धारित २० ओभरमा ५ विकेट गुमाउँदै १ सय ३२ रन जोडेको थियो । स्टार्सका लागि अमित श्रेष्ठले अर्धशतकिय पारी खेलेका थिए । अमितले ५० बल खेल्दै ४ चौका र २ छक्काको मद्दतमा ५० रन जोडेका थिए । 

सन्दीप रजालीले २८ रन जोडे । उनले ३५ बल खेल्दै चार चौकाको मद्दतमा २८ रन जोडे । सौरभ खनालले २५, पवन सराफले १९ रन जोडे । स्टार्सले सुरुवाती दुई विकेट १.२ ओभरमा मात्र ६ रन हुँदा गुमाएको थियो । पहिलो विकेटको रुपमा स्टार्सले रोहन मुस्तफालाई गुमाउँदा दोस्रो विकेटको रुपमा सुनिल धमलालाई गुमाएको थियो । 

मुस्तफा शुन्य रनमा आउट भएका थिए भने धमलाले मात्र तीन रन जोडे । काठमााडौं गोल्डेन्सकाा लागि नन्दन कुमार यादवले दुई तथा ललित नारायण राजवंशी र अंकित दवासले एक एक विकेट लिए ।