रियल ला लिगाको दोस्रो स्थानमा उक्लियो

एजेन्सी- रियल मड्रिड स्पेनिस ला लिगा फुटबलको दोस्रो स्थानमा उक्लिएको छ । शनिबार राती भएको खेलमा एट्लेटिको मड्रिडलाई ३-१ गोलले पराजित गर्दै रियल ला लिगाको दोस्रो स्थानमा उक्लिएको हो । 

पहुना टोली रियलको जितका लागि कासिमिरो, सर्जियो रामोस र ग्यारेथ बेलले एक एक गोल गरे भने एट्लेटिकोका कालगि एन्टोनियो ग्रीजम्यानले एक गोल फर्काएका थिए । खेलको १६ औं मिनेटमा कासिमिरोको गोलबाट पाहुना टोली रियलले सुरुवाती अग्रता लिएको थियो । 

तर,  खेलको २५ औं मिनेटमा घरेलु टोलीका लागि ग्रीजम्यानले गोल गर्दै खेल १-१ को बराबरीमा ल्याए । पहिलो हाफ सकिन २ मिनेट बाँकी रहँदा कप्तान रामोसले पेनाल्टीमा गोल गर्दै रियललाई पहिलो हाफमा २-१ को अग्रता दिलाए । 

त्यसपछि खेलको ७४ औं मिनेटमा बेलले गोल गर्दै रियललाई ३-१ को जित दिलाए । यो गोलसंगै बेलले रियलको लागि सबै खाले प्रतियोगितामा १०० गोल पुरा गरेका छन् ।

जितसँगै रियलले २३ खेलबाट ४५ अंक जोडेको छ । रियलले एट्लेटिकोलाई १ अंकले पछि पार्दै दोस्रो स्थानमा उक्लिएको हो । एट्लेटिकोको ४४ अंक छ ।