खेलाडी छनोट खुला प्रतिस्पर्धाबाट हुनेछ : एन्फा

काठमाडौं- अखिल नेपाल फुटबल संघ (एन्फा)ले विभिन्न उमेर समूहका प्रतियोगिताका लागि खेलाडीको छनोट खुल्ला प्रतिस्पर्धाबाट गर्ने बताएको छ । दक्षिण एशियाली फुटबल महासंघ (साफ) र एशियाली फुटबल महासंघ (एएफसी)द्वारा आयोजना हुने विभिन्न उमेर समूहको प्रतियोगिताका लागि एन्फाले खुल्ला प्रतिस्पर्धाबाट खेलाडी छनोट गर्ने बताएको हो । 

आगामी फागुनको पहिलो साताबाट खेलाडीको छनोट खुल्ला प्रतिपस्र्धाबाट गरिने एन्फा महासचिव इन्द्रमान तुलाधरले जानकारी दिए । उमेर समूहको दक्षिण एशियाली फुटबल प्रतियोगिता र एशियाली फुटबल प्रतियोगिता खेल्न एन्फाले खेलाडीको खुल्ला छनोट गर्नेछ । 

‘खुल्ला प्रतिस्पर्धाबाट खेलाडी छनोट हुने टोलीले प्रतियोगितामा नतिजा सोचेभन्दा राम्रो आउने भएकाले यो कार्यक्रम शुरु गर्न लागेका हौं,’ महासचिव तुलाधरले भने । एन्फामा आबद्व जिल्ला फुटबल सघंलाई पत्र लेख्दै एन्फाले उमेर समूहका खेलाडी छनोट गरिने जनाउँदै खेलाडीको प्रशिक्षण शुरु गर्न समेत आग्रह गरेको छ । 

महासचिव तुलाधरका अनुसार एन्फामा उमेर समूहको प्रतियोगिता खेल्न करिब ११ खेलाडी रहेका छन् । अन्तिम छनोटमा एन्फा र जिल्लाबाट आएका खेलाडीलाई समावेश गरिनेछ ।