एएफसी कप : मनाङको पहिलो खेल बंगलादेशी क्लब ढाका अबहानीसँग 

काठमाडौं-सहिद स्मारक ‘ए’ डिभिजन लिग विजेता मनाङ मस्र्याङ्दी क्लबले एएफसी कप फुटबल अन्तर्गत समूह चरणको पहिलो खेलमा बंगलादेशी क्लब ढाका अबहानी लिमिटेडसँग भिड्ने भएको छ । 

सोमबार एसियन फुटबल महासंघ (एएफसी)ले सार्वजनिक गरेको खेल तालिका अनुसार मनाङले पहिलो खेलमा अबहानी लिमिटेडको सामना गर्ने भएको हो  । समूह ‘ई’ मा रहेको मनाङले पहिलो खेलको रुपमा एन्फा कम्प्लेक्स सातदोबाटोमा अप्रिल ३ मा अबहानी लिमिटेडको सामना गर्ने छ ।

मनाङले अबहानीसँग अवे खेल भने ढाकास्थित बंगबन्धु स्टेडियममा आगामी जुन १९ मा खेल्नेछ । होम एण्ड अवेको आधारमा हुने प्रतियोगिताको विजेता टोलीले इन्टर जोन प्ले अफको सेमिफाइनलमा स्थान बनाउने छन् । प्ले अफमा समूह ’इ’ को विजेतासहित समूह ’डी’, ’आइ’ र एसिन क्षेत्रको विजेताले खेल्नेछ ।

यस्तै मनाङले प्ले अफबाट आउने टोलीसँगको अवे खेल अप्रिल १७ मा खेल्नेछ । जसमा भारत, श्रीलंका र भुटान मध्येको एक टोलीले खेल्नेछ ।  प्ले अफबाट आउने टोलीसँग मनाङले होम खेल आगामी जुन २६ मा एन्फा कम्प्लेक्समा खेल्नेछ ।

त्यस्तै मनाङले भारतको च्याम्पियन मिनेर्भा पन्जाबसंगको अवे खेल भुवनेश्वरमा आगामी मे १ मा खेल्नेछ । मनाङले पन्जाबसँगको होम खेल मे १५ मा एन्फा कम्प्लेक्समा खेल्नेछ ।