नेपाललाई इतिहास रच्ने अर्को मौका

काठमाडौं- युएई भ्रमणमा रहेको नेपाली राष्ट्रिय टोलीले आज (आइतबार) टि-२० अन्तर्राष्ट्रिय सिरिजअन्तर्गत युएईसँग अन्तिम खेल खेल्दैछ । खेल दुबईस्थित आइसिसी क्रिकेट एकेडेमी मैदानमा नेपाली समय अनुसार दिउँसो २:४५ बजे सुरु हुनेछ । 

टी-२० सिरिजको पहिलो खेल गुमाएको नेपालले दोस्रो खेल जित्दै सिरिज बराबरी बनाएको छ । अन्तिम खेल नेपालले जित्नसके पहिलो टि-२० अन्तर्राष्ट्रिय उपाधि जित्नेछ । राम्रो लयमा देखिएको नेपाली टोलीले टि-२० सिरिज जितेर नेपालसामु अर्को इतिहास रच्ने मौका आएको छ । 

जुनसुकै ठूला प्रतियोगितामा नेपाली ब्याट्सम्यानको प्रदर्शनलाई लिएर टीप्काटिप्पणी हुने गरे पनि जारी सिरिजमा नेपाली ब्याट्सम्यानले पनि उत्कृष्ट प्रदर्शन गर्न सक्नेछन् भनी प्रमाणित गरिसकेका छन् । 

त्यसो त अझै युवा ब्याट्सम्यानद्वय रोहितकुमार पौडेल र सन्दीप जोराले आफूलाई उत्कृष्ट युवा ब्याट्सम्यानमा प्रमाणित गरिसकेका छन् । रोहितले कम उमेरमा अर्धशतक बनाउने नयाँ विश्व रेकर्ड बनाएका छन् भने जोराले टि-२० मा कम उमेरमा अर्धशतक बनाउने रेकर्ड कायम गरिसकेका छन् । 

टि-२० सिरिजमा ओपनर ब्याट्सम्यानले उत्कृष्ट प्रदर्शन गर्न नसेके पनि मध्यक्रमका ब्याट्सम्यानका तथा बलरहरुको प्रदर्शन देख्नलायक रहँदै आएको छ । दोस्रो टि-२० मा पनि मध्यक्रमका ब्याट्सम्यानले राम्रो साझेदारी गर्दा नेपालले चार बल बाँकी छँदा लक्ष्य भेट्टाएको थियो ।