शीर्षस्थानको लिभरपुल र सिटीले बराबरी खेले

एजेन्सी- इंग्लिश प्रिमियर लिग फुटबलमा शीर्षस्थानको लिभरपुल लेस्टर सिटीसँग बराबरीमा रोकिएको छ । बुधबार राति भएको खेलमा लिभरपुलले सुरुवाती अग्रता जोगाउन नसक्दा सिटीसँग १-१ को बराबरीमा रोकिएको हो ।

घरेलु मैदानमा लिभरपुलले सुरुवाती अग्रता लिएको थियो । खेलको २ मिनेट नबित्दै घरेलु मैदाननमा सुरुवाती अग्रता लिएको लिभरपुलले पहिलो हाफको इन्जुरी समयमा नै एक गोल खाँदै खेल बराबरीमा आएको थियो । 

लिभरपुललाई सुरुवाती अग्रता दिलाउन साडियो मानेले गोल गरेका थिए । तर, पहिलो हाफको इन्जुरी समयमा सिटीका ह्यारी मागुइरेले गोल गर्दै खेल १-१ को बराबरीमा ल्याए । 

दोस्रो हाफमा आक्रमक खेल प्रस्तुत गरेपनि दुबै टोलीबाट थप गोल हुन नसक्दा खेल १-१ को बराबरीमा सकिएको हो । बराबरीसँगै लिभरपुलले शीर्ष स्थानको अग्रता फराकिलो बनाउने मौका गुमाएको छ । 

बराबरीपछि लिभरपुलले २४ खेलबाट ६१ अंक जोडेको छ । लिभरपुल दोस्रो स्थानको म्यानचेस्टर सिटी भन्दा ५ अंकले अघि छ । सिटीको ५६ अंक छ । लेस्टर सिटी ३२ अंकसहित ११ औं स्थानमा छ ।