नेपाललाई ऐतिहासिक एकदिवसीय सिरिज

काठमाडौं- नेपाली राष्ट्रिय क्रिकेट टोलीले पहिलो ऐतिहासिक एकदिवसीय अन्तर्राष्ट्रिय सिरिज जितेको छ । दुबईस्थित आईसीसी एकेडेमीको मैदानमा भएको सिरिजमा युएईलाई २-१ ले पराजित गर्दै पहिलो ऐतिहासिक सिरिज जितेको हो ।  

सिरिजको पहिलो खेल ३ विकेटले पराजित भएको नेपाल दोस्रो खेलमा ब्याटिङ र बलिङमा उत्कृष्ट प्रदर्शन गर्दै १ सय ४५ रनको फराकिलो अन्तरले विजयी भएको थियो । 

त्यस्तै तेस्रो अर्थात निर्णायक खेलमा युएईलाई ४ विकेटले पराजित गर्दै सिरिज जित्न सफल भयो । युएईले दिएको २ सय ५५ रनको लक्ष्य पछ्याएको नपालले ४४.४ ओभरमा ६ विकेट गुमाउँदै लक्ष्य भेट्टायो ।

नेपालको ऐतिहासिक सफलताका लागि कप्तान पारस खड्काले कीर्तिमानी शतकीय पारी खेले । उनले १ सय ९ बल खेल्दै १ सय १५ रन जोडे । शतकीय पारी खेल्दा पारसले १५ चौका र एक छक्का प्रहार गरेका थिए ।

त्यस्तै उपकप्तान ज्ञानेन्द्र मल्लले ३१ रन जोडे । उनले ३५ बलमा ४ चौकाको मद्दतमा ३१ रन जोडेका थिए । सोमपाल कामीले २६, आरिफ सेफले २१, सन्दीप जोराले १९ र रोहित कुमार पौडेलले १६ रन जोडे ।

युएईका लागि अहमद र इमरान हैदरले समान २-२ विकेट लिए भने कादिर अहमद र मोहमद नाभिदले एक एक विकेट लिए । यसअघि टस हारेर पहिले ब्याटिङको निम्तो पाएको युएईले निर्धारित ५० अ‍ेभरमा ६ विकेट गुमाउँदै २ सय ५४ रन बनायो । 

युएईका लागि पाँचौ र छैठौं नम्वरमा मैदान प्रवेश गरेका द्वय सिपी रिजवन र अन्वरले १ सय रनको साझेदारी गरे । २०.२ ओभरमा ४ विकेट गुमाएर ४७ रन मात्र जोडेको युएईका लागि द्वय रिजवन र अन्वरले युएईको स्कोर माथि उकास्न महत्वपूर्ण योगदान दिए । 

अन्वरले युएईका लागि उत्कृष्ट अर्धशतकिय अविजित पारी खेले । उनले ७० बलमा ९ चौका र २ छक्का प्रहार गर्दै ८७ रन बनाए । त्यस्तै सिपी रिजवनले ४५ रन जोडे । त्यस्तै आक्रमक ब्याटिङ गर्दै मोहम्मद बुटाले पनि अर्धशतक बनाए । 

उनले ३१ बलमा नटआउट रहदै ५ चौका र ४ छक्काको मद्दतमा ५९ रन जोडे । मुहमद उसमानले २६, गुलाम साब्बरले १८ र मोहमद नवीदल ११ रन जोड्दा अहमद र सुरी शुन्य रनमा आउट भएका थिए । नेपालका लागि करन केसी र कप्तान पारस खड्काले २-२ तथा सोमपाल कामी र सन्दीप लामिछाने एक एक विकेट लिए ।