रोनाल्डोको पेनाल्‍टी गोलमा युभेन्ट्स विजयी

एजेन्सी- स्टार खेलाडी क्रिस्टियानो रोनाल्डोके पेनाल्टी गोलमा य’शभेन्ट्सले संघर्षपूर्ण जित निकालेको छ । इटालियन सिरी ‘ए’ फुटबलमा शीर्षस्थानको युभेन्ट्सले लाजियोलाई २-१ को गोल अन्तरले पराजित गरेको हो ।

लाजियोको मैदानमा आत्मघाती गोलबाट पछाडी परेको युभेन्ट्सले पुनरागमन जित निकालेको हो । पहिलो हाफ गोलरहित बराबरीमा सकिएको खेलको ४९ औं मिनेटमा इम्री कानको आत्मघाती गोलबाट लाजियोले सुरुवाती अग्रता लिएको थियो । तर, त्यसपछि युभेन्ट्स खेलमा फर्कियो । 

खेलको ७४ औं मिनेटमा जोआओ कानसेलोले गोल गर्दै युभेन्ट्सलाई खेलमा फर्काए । त्यसपछि खेलको ८८ औं मिनेटमा क्रिस्टियानो रोनाल्डोले पाएको पेनाल्टी अवसरमा गोल गर्दै युभेन्ट्सलाई २-१ को जित दिलाए ।

जितसँगै युभेन्ट्सले लिगमा ११ अंकको अग्रता बनाएको छ । लिगमा अपराजित रहेको युभेन्ट्सले २१ खेलबाट ५९ अंक जोडेको छ । दोस्रो स्थानको नापोली ४८ अंक छ । पराजित लाजियो ३२ अंक जोडेर आठौं स्थानमा छ ।