अफ्रिदीलाई पछि पार्दै रोहित बने एकदिवसीयमा अर्धशतक बनाउने सबैभन्दा कन्छा खेलाडी

काठमाडौं- नेपाली राष्ट्रिय क्रिकेट टोलीका युवा खेलाडी रोहित कुमार पौडेलले एकदिवसीय अन्तर्राष्ट्रियमा सबैभन्दा कम उमेरमा अर्धशतक पुरा गर्ने खेलाडीको रेकर्ड बनाएका छन् । उनले २३ वर्ष अघि पाकिस्तानका शहिद अफ्रिदीले बनाएको रेकर्डलाई तोड्दै आफ्नो नाममा गरेका छन् । 

युएईसँग एकदिवसीय सिरिज अन्तर्गतको दोश्रो खेलमा सातौँ नम्बरमा ब्याटिङ गर्ने आएका रोहितले ५५ रन बनाएका थिए । उनले ५८ बल खेल्दै ७ चौकाको मद्दतमा उक्त रेकर्ड बनाएका हुन् । 

सन् १९९६ मा चर्चित पाकिस्तानी क्रिकेटर अफ्रिदीले श्रीलंका बिरुद्ध एकदिवसीय अन्तर्राष्ट्रियमा डेब्यु गर्दै शतक बनाएका थिए । त्यो बेला शाहिद अफ्रिदीको उमेर १६ वर्ष २१७ दिन थियो । 

रोहित पौडेलको उमेर शनिबार अर्धशतक बनाउने क्रममा १६ वर्ष १४६ दिन रहेको छ । अर्थात रोहितले अफ्रिदीको रेकर्ड ७१ दिनले तोडेका छन् । यो रेकर्ड बनाउने सुचीमा पहिलो र दोश्रो नम्बरमा रोहित र शाहिद छन् भने तेश्रो र चौथो नम्बरमा पनि शाहिद अफ्रिदीनै छन् । 

अफ्रिदीले १६ वर्ष २४५ दिन उमेर हुँदा जिम्बाबेविरुद्ध र १६ वर्ष ३२३ दिन उमेर हुँदा वेस्ट इन्डिजविरुद्ध अर्धशतक बनाएका थिए । ३ वटै इनिंग अफ्रिदीले सन् १९९६ मा खेलेका थिए ।

हङकङका खेलाडी अंशुमन रथ यो सुचीको पाँचौ नम्बरमा रहेका छन् । जसले १७ वर्ष ४ दिनको उमेरमा पपुवा न्यु गिनीविरुद्ध सन् २०१४ मा अर्धशतक बनाएका थिए । यस्तै यो सुचीमा छैठौं, सातौँ र आठौँ नम्बरमा शहिद अफ्रिदीनै छन् । 

नवौं र दशौ नम्बरमा अफगानिस्तानका उश्मान घानी छन् भने ११ औं नम्बरमा पाकिस्तानकै मोहम्मद आमिर रहेका छन् । रोहित पौडेल एकदिवसीय अन्तर्राष्ट्रिय क्रिकेटमा डेब्यु गर्ने पनि विश्वकै चौथो कान्छा खेलाडी हुन् । 

पौडेलले गत वर्ष नेदरल्याण्डसँग नेपालले खेलेको एकदिवसीय सिरिज अन्तर्गत दोश्रो एकदिवसीयमा नेपालको लागि डेब्यु गरेका थिए । त्यस दिन रोहितको उमेर १५ वर्ष ३३५ दिन मात्रै थिए ।